唔知有無朋友同我一樣，對「彈幕 Play」有種情意結，明明玩得好水皮，但係就因為畫面好靚，所以想不斷試！不過近年呢類型新遊戲選擇唔多，數到最近期嘅，都係《東方》《雷電》等作品，所以當我知道《斑鳩 IKARUGA》黎緊居然會移植到 Switch，就知道一定要同大家分享！

《斑鳩 IKARUGA》本身係街機 Arcade 黎，首度推出已經係 2001 年嘅事了，之後陸續移植過唔同機種。對於鍾意玩彈幕射擊嘅朋友黎講，呢個遊戲都係經典之一，而且佢係有故事的，內容大約係講男主角想要對抗國家嘅「主戰派」，為咗令日本一直和平，他就登上名為「斑鳩」嘅戰機，開始奮戰。

遊戲操作好簡單，基本上使用嘅只有兩粒制同埋方向鍵，機體接觸到敵人、敵方子彈、障礙物就會扣一條命。遊戲入面分「白＆黑」兩種屬性，玩家部機接收同樣屬性會加強力量，而用相反顏色去攻擊敵人就會傷害加倍；當力量增強到某個點，就可以施展「力量解放」射出強力激光砲（即係超必！）

聽落就簡單，不過，《斑鳩》嘅彈幕都幾癲的（笑），前幾年我試玩過一次，玩到流哂眼水都仲係玩得好差。呀，提醒大家，玩呢個遊戲千祈唔好戴隱形眼鏡玩，真係眼都盲架！

可以單機雙打都得

《斑鳩》5 月 30 日會喺 Switch 上面推出，售價為 1500円左右。使用手提 Mode 嘅時候，個 Mon 可以打橫或者打直睇都得。遊戲一共分為 Easy / Normal / Hard 三種難度；同時有故事模式及競賽模式，可以同朋友合力或者鬥高分都得！鍾意戰機射擊＋彈幕元素嘅朋友，記得月尾留意下啦！