將會係今年九月推出既注目大作《Marvel’s Spider-Man》，大家除咗關心有咩新衫換之外，最想知道既就係遊戲系統有咩特別。最近外媒 Gameinformer 就訪問咗遊戲製作總監 Bryan Intihar，係訪問入面佢透露咗唔少新既資訊，睇完之後令人更加期待呢隻作品。

其實之前已經有消息話《Marvel’s Spider-Man》並唔會有實時晝夜及天氣變化系統，對於呢點，Bryan Intihar 解釋：「係好多遊戲入面，為咗營造更好既氣氛，一般黎講都會有特定既場景同天氣。而我地亦都希望玩家第一次經歷特定劇情既時候，都係處於特定既場景之下，令到故事表達更多情感。不過當玩家爆機之後，其實係可以手動選擇返世界場景既時間同埋天氣狀況。」

當然除咗以上系統之外，訪問當中仲有其他重要訊息，其中最重要既就係爆衫系統！佢提到只要去到特定既劇情，蜘蛛俠既衫就會被打破，另外佢無否認到遊戲中會出現黑色既蜘蛛俠服裝，不過就並唔代表係遊戲內會見到 Venom，留返比大家估下先。

其他資訊包括：遊戲雖然係開放世界，不過只限於紐約曼克頓區。另外蜘蛛可以徒手爬牆，而且係高處掉落都唔會受到傷害，係落地之後會自動翻滾卸力。係遊戲當中仲會有一項相關技能升級，升級後玩家可以於掉落時吐絲，從而係空中拎返控制權。最後就係，遊戲會提供多個難度比玩家選擇。

《Marvel’s Spider-Man》將於今年 9月6日正式上市，由 PS4 獨佔。