Nintendo Switch 真係一個可以好好嘅平台，令玩家有機會玩到唔少類型嘅小品遊戲。如果你對復古畫風 2D 遊戲有興趣，今次介紹呢隻《Celeste 蔚藍山脈》或者會適合你！

《Celeste 蔚藍山脈》係一隻由加拿大獨立遊戲工作室「Matt Makes Games」開發嘅小品遊戲，話就話係小品，但係佢嘅來頭都幾厲害，遊戲雛型當時喺比賽《Global Game Jam》入面，只係用咗 4 日時間去研發，而當《Celeste 蔚藍山脈》 2018 年 1 月正式於 Steam 上面推出嘅時候，IGN 比咗佢 10/10 滿分評價！係滿分呀痴線！

成為 IGN 2018 年首個獲得滿分評價嘅遊戲，呢隻《Celeste》到底係玩乜？故事主線就係講女主角因為某個原因想登上雪山，而遊戲就係玩佢上山嘅過程。

基本玩法係攀牆同跳躍，但係，其實呢隻 Game 都幾 Hardcore 的，每一章都有大量機關，亦有地形影響，女主角亦可以拎道具而獲得「衝刺」等等嘅力量；如果咁講你覺得難理解，不如將佢理解為一隻難玩版《Mario》！因為遊戲過關係一回事，你係咪拎齊哂啲獎勵又係另一回事。

同《Mario》好似嘅就係，遊戲中有大量隱藏關卡等玩家發掘，如果收齊某啲道具，仲會拎到彩蛋！老老實實，我淨係見到遊戲畫面截圖都覺得難玩，而呢個遊戲起碼有 600 幾關比玩家挑戰的！諗起都有排玩……

《Celeste》目前已經喺 Steam 上架，PC、Mac、Linux 都玩到，而遊戲黎緊 5 月 10 日都會於 Switch 上面登場，美版 e-shop 定價為 USD 19.99（約 HKD 160）。鍾意玩 Hardcore 2D 遊戲嘅朋友，不妨到時挑戰下啦！