今次同大家分享感想嘅《Max: The Curse of Brotherhood》其實並唔係新作品，佢第一次推出係喺 2013 年，不過當時針對海外用家於 Xbox One 上面發佈，2014 年就落 Steam，係直至 2017 年尾先移植落 PS4  及 Switch（美版及日版），所以對於非 XBox 及 PC 玩家嘅我黎講，真係滄海遺珠吖！（明明只係你自己後知後覺！）

遊戲主線好淺白，玩家飾演主角 Max，因為覺得細佬好煩，所以個心一直好想佢消失，某一日嬲起上黎，上網搵「令細佬消失嘅方法」，點知真係令佢被異世界魔神帶走咗！

Max 心諗「我話唔要個細佬都係講吓架啫！」，所以，為咗救返細佬，Max 就衝入去異世界，希望帶返佢返黎，上演一幕感人肺腑（但係有少少中二）嘅兄友弟恭異聞錄～

至於遊戲玩法相當過癮，表面上係一隻直線動作 Game，但係隨住劇情推進，你手上唯一道具……一枝 Marker，會不斷累積唔同屬性力量，幫你喺困境中開路、或者協助你整死啲敵人。

一枝 Marker 救世界

例如橙色（地屬性）可以幫你建立跳台

綠色（木屬性）就可以變出樹枝或者樹根

大部份遊戲難度在於，玩家要諗下點樣通過地形（有時會比怪追，超考反應）

自己的路自己開～

可能睇到呢度，你都覺得「無乜難度吖！」，嗯……我會答你，遊戲整體難度合理，不過有時都真係要用下腦，因為有時你整啲樹枝出黎、整斷佢，係可以幫你觸發一啲機關打怪、或者可以去到一啲非主線要去嘅位置的。

例如用高度差，將個木箱跌去唔同方向

遊戲中亦有一啲收集元素架，例如係下圖中隻「眼仔」，呢隻眼仔係魔王用黎監視異世界嘅……你當係閉路電視啦！雖然，有時要去到佢地嘅位置，都幾麻煩的，不過，總有用的，有收集控嘅朋友請盡量清除（笑）

雖然呢隻《Max》係舊 Game，不過黎到 Switch 之後，畫面都有再調整過的，其實你話佢係今年先出嘅遊戲我都信架！畫面靚、易上手、節奏明快、每一關卡會自動 Auto Save，死咗都可以直接喺同一個位黎過，絕對係想比玩家「以樂趣為先」嘅遊玩體驗。

遊戲喺 Steam 或者 Switch e-shop（美服＆日服）都買得到，售價約為港幣 120 左右。如果你覺得呢排無咩玩悶悶地，不妨考慮下挑戰呢隻小品吖！