近年台灣本土製作遊戲繼續興起，今次寫呢隻由「赤燭」遊戲工作室開發嘅《返校》係我強烈推介比大家嘅作品！有留意開恐怖遊戲嘅朋友，或者好早已經聽過《返校》嘅大名，因為佢早喺 2017 年時已經先行於 Steam 上面推出，去到前排就加入多國語言對應，落埋 Switch，反攻日本仲反應幾好添～

咁點解一隻出咗成年嘅遊戲，我而家先黎寫感想文呢？答案係因為本人其實超細膽，細膽程度係當年 PS2 玩《零～紅蝶～》玩 Easy Mode 都玩咗半年先爆機，無他，因為次次一嚇到個心離一離，我就會驚到 Quit game……OK，你可以笑我虧 orz

《返校》以 1970 年左右嘅台灣為背景，喺一間陳舊中學入面，女主角一覺醒來，發現全校人消失，但係自己卻被困在學校入面，而學校入面嘅氛圍亦都變得極為陌生，大量咒符、上鎖嘅門、仲有窮追猛打嘅怨靈……遊戲主線就係講，玩家飾演嘅女主角點樣可以逃出學校！

不過，你玩落就會知道，真正嘅故事，並唔係只係一個「逃亡 Play」咁簡單，喺學校入面不斷搵到嘅片字隻語、偶爾於遊戲中穿插嘅恐怖畫面，都提醒緊你，女主角，可能就係惡夢本身嘅源頭。

故事再講落去就劇透啦，所以我唔想掃各位玩家雅興；我只會講，遊戲雖然只係一隻 2D 探索解謎遊戲，驟眼睇操作好似好簡單易明，不過遊戲入面嘅音效、昏暗嘅景象、角色本身嘅陰沉，都令我一路玩一路感到無形壓力，所以一有奇怪事發生，我就「嗚哇哇哇」熄 Mon……orz

台灣 1970 年代本來發生啲咩事，相信我同你都唔係好清楚，我都係玩咗《返校》先有興趣去了解當時嘅歷史背景；以遊戲設定黎講，《返校》真正嘅情節，如果發生喺嗰個年代，的確都幾突破的（笑）而遊戲成功之處係，你玩得越後，你就會明白，其實你唔係越黎越能夠離開學校，而只係越黎越接近悲劇嘅真相。

我之所以會喺題目話「因為熟悉所以更恐怖」，因為台灣畢竟都係華語地方，某啲中式傳統習俗，其實同我地認知嘅都好相似；而遊戲入面不時用到八卦、符咒、血印、甚至係一啲中式戲曲入面用到嘅嘢作為題材，而呢啲事物，都令我玩嘅時候，心入面不禁毛毛 der～（抖）

總括黎講，《返校》我玩咗好耐，原因係……你要明白我通常是晚上放工先有時間打機，但係我瞓覺前打呢個遊戲真係好驚啊 orz 不過，如果一向係恐怖遊戲嘅 Fans、又或者你只係單純想支持華語地區遊戲創作都好啦，《返校》作為「赤燭」公司首個作品，真係非常出色了，亦都好期待呢間工作室下一隻作品。

最後比大家睇下遊戲 Trailer 感受下：