大家認識 CD Projekt Red 呢間公司好可能係因為《巫師 3》呢隻遊戲，而呢間公司出品既遊戲其實都質素非常之高，可以話係信心保證。所以唔少 Fans 都非常期待佢地黎緊既新作《Cyberpunk 2077》，睇條宣傳片就好正，不過就一直無乜更多既消息流出，真正得個等字！但係最近一份財務報告就話比大家聽，《Cyberpunk 2077》好快就會有新作宣傳活動開始，亦即係話遊戲相信會好快見街！

根據外國論壇 Reddit 既相關內容，2015 年《巫師 3》發售之後，公司每年既業績都表現優秀，去到 2017年利潤仲去到接近2億美元既水位。所以係 2017年，CD Projekt 曾經派咗成億美元股息比相關人士。不過去到今年情況就有啲轉變啦，佢地唔會派息比相關人士，原因係：佢地要用呢筆錢幫《Cyberpunk 2077》做宣傳。

當年幫《巫師 3》做宣傳的時候，CD Projekt 其實係問經銷商借錢宣傳的，當然後黎《巫師 3》大賣佢地就還返晒啲錢啦。但係黎到《Cyberpunk 2077》就唔再借錢，而係直接用公司現金流做新作宣傳。當然呢個做法都算幾冒險，但係同時亦都顯示出佢地對《Cyberpunk 2077》既信心。而且佢地當遊戲進入宣傳階段，亦即係話遊戲發售日好大機會會提前，估計今年內應該可以玩得到。

《Cyberpunk 2077》已知既係角色扮演遊戲。遊戲設定係 2077年一個叫做 Night City 既地方，因為科技發達而出現過度改造並失去控制既暴走生化人，玩家扮演專門處理呢類事件而組成既特殊部隊入面一員。發售日期未定，對應 PlayStation 4 / Xbox One / PC 平台。