有返咁上下年紀既一定聽過《羅德斯島戰記》既大名，話晒以前電視有播嘛。呢部作品原本係日本作家水野良所著既輕小說，而當年第一卷《灰色的魔女》就係 1988年發售，當時作品極受歡迎，仲衍生咗動畫、遊戲、舞台劇等等唔同類型作品。為咗慶祝作品踏入 30週年，角川特別宣布將會推出一隻由小說改編既新作遊戲，而且望落去質素仲好高添！

《羅德斯島戰記》新作遊戲將由負責過《真．女神轉生 同調序曲》既 Ladybug工作室製作。

今次新作遊戲屬於 2D橫向動作遊戲，遊戲有極重惡魔城影子，不論動作表現甚至係角色移動後出現既藍色殘影，相信都有參考惡魔城《月下夜想曲》設計。

由影片所見玩家操作既人物係女主角蒂德莉特，暫時未知會唔會有其他角色。影片除咗展示戰鬥場面外，仲介紹埋角色動作以及動作繪製過程。雖然新作係採用像素畫風，但係動作表現出奇地流暢，打擊感亦都做得唔錯，相信就算唔係《羅德斯島戰記》Fans 都會有興趣，話晒黎緊除咗惡魔城之父隻《Bloodstained: Ritual of the Night》之外，暫時就係呢隻最似樣嘛！

遊戲推出日期同埋對應機種暫時都未有任何資訊，不過睇個款似係會有 PS4 / PC / Switch 版本，希望講中啦！