Andrew House，自 2011 年開始領導 PlayStation 既前 CEO，帶領 PlayStation 走出 3代既低潮，繼而取得 PlayStation 4 既大成功，能力無庸置疑。而呢位猛人雖然係上年年尾正式離開 PS 家庭，但係佢講既野依然極具參考價值。係琴日 GamesBeat conference 入面，呢位猛人就講述下世代主機既睇法。
前 SIE 話事人 Andrew House
Andrew 提到：「係 2013年果陣，全世界都話家用機會死，因為成個市場都移向手機遊機遊戲，而家用機將會毫無希望。慶幸地，佢地全部都錯既。」亦即係話，Andrew 對家用機市場依然抱有強大信心，咁當然大家最想知道既就係 PlayStation 5 既消息，到底佢又點睇 PlayStation 黎緊既走勢？
「由於家用機係全球市場黎講都尚係缺乏代表性同滲透度不足，所以依然充滿住強大既潛力。仲有大家唔好忘記中國市場係尚未開發的。對於家用機既生命週期我係保持樂觀既態度。」同時佢亦都講到比起新主機，大家唔好忘記同代主機既升級版，例如 PS4 Pro 同 Xbox One X 咁，相信 PS4 仍然有一段好長既路要走。
PS4 Pro 到而家都仲係缺市
「要知道硬件公司去延長產品壽命必需係處於一個安全以及可管理既方向上面。」照咁睇似乎短期內都唔會有 PS5 既消息，要知道其實 Andrew 離職只係短短既半年。
最後 Andrew 亦都講出佢對下一代家用機所使用既媒體睇法。佢認為下一代主機都係會使用光碟多於只限於下載及串流 （我諗起部 PSP GO），同時佢亦都認為保留呢類傳統媒介未必係壞事黎。雖然佢認為下一代主機未係下載及串流 Only，不過佢都認為雲端串流遊戲係下一世代主機必定係一個好重要既元素。
「如果你睇返遊戲機歷史，曾經會有一啲轉折點令到業界被顛覆，並且會有新參與者出現，其中之一就是當你係分銷方法上進行大規模轉變時。」佢提出咗個例子就係當年由遊戲卡帶轉變為光碟既時候，新既參與者就會出現。而下世代既串流必定會擔當呢個位置，業界係時候要細心思考一下到時既商業模式啦！
VJGamer 觀點
其實有無 PS5 對我地黎講係咪真係需要？當然如果目標係追上電腦配備，要去到 4K + 144Hz，然後賣三千幾蚊既我諗無玩家會拒絕到。但係如果純粹只係提升少少畫質就去開部新機的話，搞咁多野結果好可能只係做到 100分定 110分既分別，尤其係而家 4K畫面已經可以滿足絕大部份人既時候（都唔講 4K 有幾普及，你試下問身邊有幾多朋友屋企用緊 4K 電視 / Mon）。與其花更多資源去搞畫面，不如強化現有機能例如實現 4K + 穩定60Hz 表現黎得更好。
而 Andrew 提到下世代既 Streaming 會做成衝擊，如果只係網速需求不大既遊戲都尚可以，但係一牽涉到競技元素甚至電競相關遊戲，就變得不太可行。所以估計下一代主機可能會同一隻遊戲同時有分光碟版、下載版、串流版，實體碟既需求將會進一步減少，對於我地呢啲鍾意儲碟既人黎講真係感覺不太好。
VJGamer總編，細細個已經蒲機舖，機齡甚深，熱愛電玩文化。