自從出咗 Switch 呢部有手提機元素嘅機種之後，3DS 嘅遊戲相對黎講，似乎較少獲得玩家注意（因為我都玩少咗好多 3DS 遊戲）；不過，其實 3DS 仲有偶爾會有精采嘅作品推出的，例如係今次寫嘅呢隻《名偵探比卡超（名探偵ピカチュウ）》。

首先，答咗好多朋友嘅問題先：遊戲係有中文版架！入 Game 之後揀中英日文都可以，你識嘅揀西班牙文都可以（喂）

不過，當然啦，中文化嘅係台灣，所以 Pokemon 會譯做「寶可夢」、比卡超會譯做「皮卡丘」……接受唔到嘅朋友就自行用返日文吧～

如果有留意開遊戲相關消息嘅朋友，應該會知道《名偵探比卡超》其實係以「比卡超」為主角衍生出黎嘅支線故事，同寵物小精靈呀、鬥技場呀係毫無關係的～

故事中嘅比卡超，因為意外，失去部份兗憶，亦駛唔出十萬伏特，惟一嘅特別之處，就係有超靈活嘅頭腦，以及佢變咗大叔腔……

話時話，因為我本人都係一個聲優腔嘅關係……當我知道遊戲中比卡超嘅聲優大川透，喺日本仲配過《Transformer》柯栢文同埋《戰國 Basara》德川家康時，真係笑到收唔到聲！名副其實叔得很（笑）

劇透：不過，用心睇哂劇情嘅朋友，或者會留意到第二章入面，我地嘅偵探比卡超大叔會喺路上同另一隻「PikaPika」叫嘅比卡超相認，仲叫對方「你同你主人喺旅途上要繼續加油呀！」咁樣！其實呢度都係伏筆，至於係咩伏筆就留比大家自己玩自己睇啦！

講返遊戲本身！遊戲玩法以探索為主，一共分成 9 個章節，每個章節要查嘅案件都唔同，不過故事主線就圍繞住男主角添姆父親失蹤事件；隨住故事推進，除咗可以見到好多唔同嘅小精靈之外（有超夢夢！），仲慢慢會發現到呢個城市一連串嘅「寶可夢暴走事件」（嗱我跟遊戲譯法架咋吓！）背後嘅陰謀。

咁話明係查案，當然就要搵證據啦！遊戲雖然提示比到足、不過都有一啲解謎部份需要大家用下腦的，當然難就唔會好難架啦（笑）勝在遊戲樂趣性高。除咗解謎之外，仲會有少少 QTE（限時指令輸入）嘅成份，例如係比敵人攻擊時要拯救比卡超之類。

遊戲都幾襟玩的，作為休閒遊玩一流，又要用腦、又有比卡超治癒 Play、啲對白有時仲好溫情添……所以我真係玩得好開心！信我啦，真係好好玩，比埋條官方 Trailer 你睇吖：

據聞呢隻 Game 仲相當好賣，如果睇完呢篇感想文想入手遊戲嘅，就要快手了，因為前兩日行過遊戲店都好似賣得七七八八了。感想文到此為止，強力推介大家玩呢隻《名偵探比卡超》吖！