1. 睇過小說入場都無問題！

電影改篇由2011年出版 Ernest Cline 嘅同名小說《挑戰者1號 (Ready Player One)》(台譯《一級玩家》)，不論你睇左與未睇都好，其實係冇大影響！皆因電影版本嘅主軸冇改變，不過流程同細節上有大量改動，可以稱之為二週目/裡版圖流程，就算你睇過小說版再入場睇係唔會影響你嘅觀感樂趣！

2. 人類到虛擬世界逃避 (洗白?)

未來嘅地球同時面臨住能源危機、糧食不足、氣候惡劣、資源不均等等嚴重問題，人類選擇逃避去虛擬世界『綠洲 (OASIS)』尋求安慰。直到「彩蛋」尋寶出現，世人先覺得拎到寶藏遺產可以改變世界。

3. 極度缺乏資訊下開始尋寶

「彩蛋」尋寶就係由詹姆士 哈勒代 (James Donovan Halliday)提出，直到死後先公佈。佢將五千億美金以及整個『綠洲』嘅控制權交比第一個搵到「彩蛋」嘅玩家。而佢係『綠洲』入面留低咗一間記錄佢由細到大睇乜、玩乜、聽乜嘅資料館，以及幾句說話作為提示就宣佈開始尋寶。

Three keys open three secret gates

三把隱藏之鑰開啟三道秘密之門

Three hidden challenges test for worthy traits

探險漂泊者將在門裡受試煉 測試是否具有某種特質

Revealing three hidden keys to three magic gates

有能力熬過難關者

and those with the skill to survive these traits will reach The End where the prize awaits

將抵終點 抱得獎賞歸

簡單講係，搵到三把(銅、玉、水晶)鎖鑰，開左三道門再完成試煉就得到「彩蛋」寶藏。

4. 世界其實很大

故事入面嘅 VR世界『綠洲』並唔係一個遊戲咁簡單，佢全名係『以人類為宇宙中心之實體論的感官浸淫模擬體系 (Ontologically Anthropocentric Sensory Immersive Simulation)』。原本開始嘅時候就真係好似《No Man’s Sky》咁有幾百個星球比大家探險，而每個星球都有自己既體系，可以講得上係無窮無盡。

今次電影制作單位同遊戲廠商傾左唔少版權授權，令到有啲幾十年前嘅經典遊戲角色都可以喺電影中重現眼前。

5. 魔法道具限住係邊區先用得？

係原著小說入面，『綠洲 (OASIS)』當中分 27 個區，排列同個扭計骰一樣，每個區入面有 N 咁多嘅星球，而且每個區都有唔同嘅特性同規則。

不過電影版就變左度度都係 PVP 許可區域，小說當中嘅魔法限定區都冇埋，但係一啲高階「神器」道具都有使用限制！

例如小說中所提及嘅超人吉田變身器，雖然可以變做超人吉田並且有佢嘅能力同絕技，不過就只可以一日使用一次，而且得三分鐘時間。如果超過使用時限而仲未解除變身，『分身』就會直接宣告死亡，當然係電影入面「神器」呢個限制依然存在，不過對應角色就由吉電變為第二隻巨大神兵啦。

至於電影中有啲咩「神器」道具出場就等大家入場留意啦！

6.『分身』死左唔通自己都會死？

放心，呢個唔係 SAO，喺『綠洲』當中嘅玩家角色稱之為『分身』，『分身』喺『綠洲』死亡係絕對唔會令現實玩家身亡嘅！

雖然當中有唔同遊戲嘅角色模組比玩家使用，不過就並唔代表你用左佢個樣就會有埋佢嘅能力。例如你用 Street Fighter 中『春麗』模組，但唔代表會出到百裂腳。

而且每個玩家只可以擁有一個『分身』，違規就會失去「彩蛋」尋寶資格並且永遠唔可以再進入『綠洲』。『分身』生命值去到 0 就會死亡，角色經驗同能力都會歸 0，而道具同裝備就會跌喺死亡嘅位置，只要任何人去返你條屍既位置都可以拎得到，即係一般 Online Game 嘅「執骨」！

雖然死左要重新開過一個 1LV.嘅『分身』，不過如果你死前將自己嘅重要物品都保管好喺自己嘅「儲物櫃」，咁就可以減少自己嘅損失喇。

7.有錢真係大銀晒

除左普通玩家互相爭奪，大財團『創新線上企業  (IOI)』同樣派出大量稱為六數人(Sixers)嘅員工喺現實同『綠洲』中參與爭奪，而且仲要不計成本咁使用一啲高價值道具或者用天價去收集「神器」去阻止玩家得到「彩蛋」。

但係 IOI 點解可以咁多人力財力？某程度上可以話係官商勾結嘅成果。

IOI 本來就係全世界規模最大嘅網絡服務供應商，而最重要嘅業務就係提供網絡服務比『綠洲』使用者，相對就等於壟斷網絡。

而現實世界中資源貧乏，好多人打工之外仲要靠借貸渡日，咁 IOI 就先做放數，你找唔到數就搵『專業收數部門』去上門捉你走再變賣晒你嘅資產，仲要用聯邦政府法律去宣告你被成為「義務契約傭工」還債。咁當然你幫得佢打工，所有衣食住宿都會提供不過照收你錢，所以捉得走嘅都注定要幫佢地打工打到死為止。

IOI 員工 專業收數部門

相片提供：Warner Bros. Pictures