Fans 們等咗好耐既新一集《戰神》終於有新片發布，發布既片段長達 17分鐘，主要係演示戰鬥畫面及系統，睇完只可以話非常令人滿意！由於上集光頭佬 Kratos 已經剷平咗奧林帕斯神界，所以今集既舞台黎到北歐大地九界之巔，並且會帶埋佢個仔「Atreus」上路！

今集作品最大既變化就係畫面顯示方式由以往既 2.5D 橫向改做第三身視點，遊戲並無採用現今流行既開方世界，依然係線性式進行，但係仍然會保留隱藏通道比大家去探索。

另一樣非常大改變既就係使用武器唔再係果把招牌鎖鏈雙刀「混沌之刃」，變為比較有北歐味道，擁有冰凍屬性既「利維坦之斧」。

係操作方面同以前一樣，R1同R2分別係輕、重二種攻擊，透過不同既按鍵組合就可以打出華麗既連技。除咗基本連技之外，「利維坦之斧」係可以掉出去的，同大家熟悉既雷神之錘一樣，佢係擁有自動回歸使用者手中能力。掉出去既斧頭會令到敵人變成凍結狀態，呢個時候可以衝埋去盾擊低等敵人會比你秒殺，非常之爽。而投擲斧頭攻擊可以話係今集作品既核心，除咗戰鬥有用之外解謎亦都會用到。

掉斧頭之後，Kratos 就會變成空手狀態，呢個時候攻擊敵人就會做成暈眩值，滿咗敵人就會出現按鍵提示，行埋去撳 L3 就會使出終結技，而且官方仲話每個敵人最少都會有一種終結動作！

最後一樣裝備就係盾牌，基本上同之前一樣只要撳 L1 就係做防禦動作。如果係敵人攻擊既瞬間做出防禦動作的話仲會變成彈反，會對敵人做成一定時間既硬直。

根據官方既說法，Kratos 唔再係以前果個，見神殺神，遇佛殺佛既光頭佬，唔會再強調血腥暴力畫面表現，反而會有更多同 Atreus 之間二父子既感情刻畫。而且佢地今次希望玩家學識點樣去防禦同閃避，並且需要用到所有戰鬥技巧去玩。希望玩家玩既唔係一隻只要狂撳制就可以無腦爆機既遊戲，咁有誠意，點可以唔支持呢！