我地介紹過多次既恐龍時代多人合作求生遊戲《ARK: Survival Evolved》，繼早前出完 PS4 繁體中文版之後又有新動作，就係會將呢隻作品放落手機度！今次手機版係由 War Drum Studios 操刀，佢地之前幫過 Rockstar 移植《Bully》落手機，經驗充足。至於手機版就會同原版本有啲唔同，最大只係支援 50人線上遊玩，而且亦會有單機 Offline 模式。

遊戲既舞台係位於一座充滿恐龍既島嶼「方舟」，所以其實嚴格黎講並唔係正式既恐龍時代，有啲似侏羅紀公園咁。而玩家就需要係呢座極龐大既島上面打獵、種植、科研等等多種方式黎生存，另外仲需要起基地黎保護自己防止比其他玩家打，當然遊戲最吸引既地方就係肚餓可以食屎充饑啦。

《ARK: Survival Evolved》手機版暫時未公布收費模式，有無商城之類，不過而家就做緊 Close Beta，有興趣既玩家去呢度註冊就有機會參加呢次測試，遊戲預定會係秋季正式上市。