鐘意玩坦克 Game 既，我諗十個有九個都玩過《World of Tank》又或者《War Thunder》，以上二隻都係非常之硬派既軍事對戰遊戲；但係如果由一班萌萌少女黎操控坦克，成件事又變得易入口好多，講緊既，就係早前推出既《少女與戰車 戰車夢幻大會戰》。

雖然遊戲明顯地係《少女與戰車》 Fans 向作品，但係遊戲內竟然有異常細膩既設定，令到呢隻用動畫掛帥既遊戲變得出奇地咁精彩！

豐富的戰車種類

雖然係動畫遊戲化作品，但係，由於《少女與戰車》入面登場既戰車都係真實出現過既，全部都有晒正統既出處同相關資料，所以係本作大家會見到好多熟悉期面孔。

好似著名既纳粹德国戰車 Tiger I、蘇聯大頭仔 KV-2 等等，而且各戰車並唔係得外觀改變咁 Hea，實際上每架戰車性能係有顯著分別，例如車身重量、轉向、炮塔轉向速度、射角、Reload 時間等等全部刻意調教過，呢點真係非常有誠意！

雙炮塔 B1 都有

超出名既 T-34

三架大頭仔 KV-2 打巷戰……結果梗係比輕坦屈死 LOL

基本三種視角

極高技術含量射擊戰

唔好以為坦克一定係企定定互射，同其他坦克遊戲唔同，呢隻遊戲入面既坦克可以做出飄移動作，中坦以下都可以輕易係敵方面前快速轉向；如果你企定定，人地就好容易兜去你後面射你，而你既炮塔轉速係多數都追唔上的，所以需要邊行邊射。

KV-2 都可以飄移架，不過慢到嘔之嘛

但係，因為有移動慣性，所以炮塔亦都需要時間移去準星位置，到底幾時行、幾時射等，就變成好重要既考量。當然，如果要企定射都唔係無辦法，可以打斜自己架戰車形成「午餐時間角度」，咁人地就打你扣少好多啦！

不過記住每架車都有自己既弱點，當你企定定果陣人地打你弱點就梗容易，而且仲可以輕鬆地打爆你條履帶，如果斷咗履帶，都可以話離死不遠。

用「午餐時間角度」會大幅減低傷害

打爆履帶可以停止對方移動，幫佢變做活靶

可以爆完左邊爆右邊，分開計算的

打中弱點係扣 Double 雙害的

表面簡單實際充面戰術考量的對戰

本作最大支援 5 vs 5 對戰，由於本作唔會喺地圖直接見到敵人，而係需要經過「索敵」呢個過程。即使暴露咗行蹤，只要一段時間內無係敵人視線出現，咁地圖上你就會消失，所以並唔係一味出重坦就有利。係雪地、山地呢類高低凹凸不平地型就非常容易躲藏。

例如我試過幾場派2架重坦係山上離遠射擊、用2架中坦埋伏、一架CV-33 高速戰車繞路去突擊敵人後方，結果當然係大比數勝利！

有多條路線埋伏

佔據高地分散敵人

大勝！

當然要破解呢種戰術亦都有多種方法，好似其中一位車長技能係放偵察汽球上天空，令到己方隊伍索敵範圍大增，咁就可以快速制定應變措施，當然見招拆招亦係呢隻遊戲既樂趣所在黎（記得叫多幾個朋友一齊買）

每個角色都有自己車長技

同時都有共通技，圖為爆發 Panzer 技中，一定時間內無敵

略嫌單調的自定戰車選項

每架戰車都可以自定顏色、貼紙，透過唔同模式下擊到熊仔娃娃獲得。不過呢個部份除咗顯示出個性化之外對性能係毫無幫助，而且自定選項太少變得非常單調，期望下集（有得話）加入自定可改變戰車能力參數零件。

對戰模式以外既地圖都會見到有熊仔，打爆佢過關就會有車長或者貼紙等獎勵

本作可以透過乘坐員改變戰車能力參數，每架戰車都會有一個裝載消耗值，一般黎講越重型既戰車呢個值會越大。每位駕駛乘坐員都會有固定既裝載值，越高星就越高消耗值咁。

透過唔同既乘坐員就會增加戰車既能力參數，而車長更會有自己專屬既車長技能，往往決勝時靠車長技救到全家！

配搭唔同既成員仲會組合出特殊效果，例如快速裝填時間增加咁，試多啲唔同既組合會有意想不到效果

總結

表面上《少女與戰車 戰車夢幻大會戰》係 Fans 向作品（實際上都好似係），不過認真既製作及設定令佢遠遠超越咗呢個範疇，可視之為一隻認真既坦克戰車對戰遊戲。

雖然遊戲大部份模式都係逼你玩黎收集戰車，部份模式沉悶又重覆，好在呢幾個模式都係每間學校通關一次就夠，唔算好辛苦。當中值得一提額外對戰模式入面有幾關真係頗有難度，係日本討論區都有唔少朋友卡關卡到叫救命的，算係最好玩既對戰模式以外既 Bonus，期待會有更完善既下集出現，Panzer Vor！