《聖劍傳說 2》 話哂都係一代經典，知道佢會重製落 PS4 嘅時候，我嘅心情都幾期待的；1993 年原作嘅遊戲，當然我唔會期待 Square Enix 會好似重製《FF7》咁將佢變成超高清動作遊戲啦（笑）但係，可以用一個比較貼近現代嘅畫質，去感受一個經典舊作品，我真係覺得機會難得的。

至少，我原本是這樣認為的。點解係「原本」，請你耐心睇落去 orz

玩過原版《聖劍傳說 2》嘅朋友都不約而同地同我講「呢隻係一個好 Game」，咁呢一點我係絕對無懷疑的，今次呢個 PS4 Remake 版，雖然喺畫質上面有所改良，但係喺系統同埋劇本上，都盡量貼近原作，並無畫蛇添足嘅修改。

重製版新增：到旅館宿泊才會出現的對話情景

傳統 RPG 行迷宮解鎖解謎題～呢啲地方係幾好玩的

玩慣《FF15》呢類新式超流暢動作遊戲嘅朋友或者唔會太習慣，但係《聖劍2》完全保留原作質樸同埋單純嘅感覺……當然啦，你可能會話「喂重製畫面都咁嘅？」，嗯，咁本來呢個遊戲就唔係以畫質取勝嘅，而家只不過係純樸啫！原作 1993 年出架，Remake 完算係咁啦（好似係）

畫面算係咁啦，我收貨架

劇本方面，雖然啲對白以現代人嘅水平去睇，真係好天真好傻好 Pure 好 True；但係故事本身係引人入勝的，劇情進展節奏亦明快，不過衝唔衝到劇情，就好睇你戰鬥技巧或者 Level 高唔高了。舊式 RPG 係需要你狂打怪升 Level 的，唔夠 Level 真係好易比人秒。

唔係回合制，而係用即時遇敵戰鬥～

角色儲夠 100％ 先攻擊就會大力啲

隨住劇情推進，就會解鎖多啲屬性魔法（不過，主角係無得用的；而且 MP 值真係好低，所以要練爆啲魔法技能？得，再放一次新年假我就會夠時間了 LOL）

不過，雖然遊戲係好經典，劇本（應該）係好吸引，但係，我玩到有少少嬲豬，少少躁底，少少想啪碟。

因為，呢隻《聖劍傳說 2》嘅 Bug，真係傳說級咁多。

首先，係個操作界面。我明白遊戲想盡量原汁原味咁呈現原作嘅感覺，之但係，以前有啲唔 User Friendly 嘅設定，黎到重製，其實改一改係咪會好啲呢？

以使用魔法為例吖，撳「正方」出操作界面，然後你要再不斷撳「上／下」制黎切換道具欄、裝備欄以及魔法頁，點解唔全部簡化落個 Options 按鍵度，直接出個 Menu 比玩家睇得清楚啲呢？

雖然戰鬥唔算好緊湊，我有時間慢慢揀啫；之但係連我想用個魔法都咁鬼亂嘅時候，大佬呀我打機黎 Happy 架，點解開個 Menu 都搞到我躁底呀？

個界面比我嘅感覺都幾迷失…幾時先出到魔法頁面？

然後，就係成篇文嘅重點：Bug。

一個遊戲有 Bug 唔緊要；一個遊戲有好多 Bug 就唔係幾好。
有 Bug，但係會令到遊戲娛樂性增加嘅，無所謂；
有 Bug，但係令到個 Game 玩唔到落去嘅，就係問題。

《聖劍 2》唔知點解，衰哂兩樣。
明明佢係一個 Role Play Game，而家變成 Bug Play Game。

Bug 01：【一定係因為當時無 Google Map】隨行角色永墮異次元

首先，三個可操作角色會喺地圖上面一齊行。但係，唔知係咪敏感度做得唔夠好，好多時呢，你用緊個角色，如果行快少少、或者上左兩級樓梯，其餘啲角色就會跟唔上，唔知卡在喺邊啲位，墮落異次元（誤）

我只係行快你地兩步，上咗一層樓梯；另外兩個角色，就只識得直線撞牆，唔識跟住條路黎行

你可能會話「呢個 Bug 唔算得係啲乜吖，轉返 Lag 住嗰兩個角色，咪可以 Direct 返佢地個方向囉！」

無錯呀，師兄你講得啱呀，但係你知唔知最糟糕係點樣？就係你控制緊個角色死咗，而你嘅同伴未死；當你諗住轉用另外一個角色打嘅時候……

Quit Game 保平安呀～～

無呀！佢 Lag 住咗、過唔到版呀！一片黑暗呀！唔知去咗邊呀！
你只可以 Quit Game 再黎過呀！好彩呢個重製版有 Auto Save 咋！頂你個制！

打 Boss 又如何？角色卡住唔知喺邊，只可以 Solo Play

……打完先出返黎 T__T

Bug 02：【傲嬌新定義】你畫面話我有 MP，但係你系統話我無 MP

話說遊戲入面有啲怪，係唔太受物理攻擊的，呢個時候當然係用魔法啦！之不過，明明我個角色條 MP 滿哂，點解個系統可以話我無 MP 用唔到魔法架？喂，你個版面一格話我 Full MP，一格話我無 MP，是咪玩 Me？

新年流流唔好搵啲咁嘅野黎玩啦，我唔嚇得架大佬！

角色顯示 MP 11/11；系統顯示 MP 0/11…好霸道……

Bug 03:【同伴信唔過】同行角色突然罷工可以點做？

雖然話打單機遊戲，最重要都係信自己，NPC 呢啲外力都係唔好太倚重……但你斬多一刀就係一刀，閒閒地都會減敵人 5 HP 吖！兩個角色就 10 HP 架啦！喺啲危急關頭，10 HP 都可以好關鍵架！

之但係……

打到上面呢個 Boss 嘅時候，我唔知點解，明明打啱次序，機關就唔會啟動；但係無論我打邊隻眼先，個機關都係會郁，一郁，塊地板就會退後，變成尖刺 and kill me。

我上網查，日本玩家話呢個位好多人都遇上同我一樣嘅 Bug，無解，靠好彩先過到。

唔緊要，我如果及時打哂三隻眼，理得你機唔機關 Bug 唔 Bug，打爆你就咩都搞掂啦！點知我打第二次嘅時候先發現……

come on James 點解同伴停哂手？！

喂，你地唔識自動用魔法攻擊我都算啦，點解得返個 Boss 嘅時候，你地會停哂手唔打架？係咪夾定架？個遊戲劇本有咁 Dark 嘅咩？講自殺聯盟？定係 NPC 會聯同 NPC 殺死主角？喂點解會咁！！

就係咁，我玩到呢度，好無奈，好躁，默默地 Quit Game，默默地轉返去玩《MHW》。我其實仲係好想玩落去，但係個 Game 本身唔比我玩落去，我可以點？

我原本對《聖劍傳說 2》充滿期待，但係玩到呢度，我不得不講一句：啲 Bug 玩到我好灰，而我仲未能夠將呢啲 Bug 當成 Kuso 系嘅元素令我繼續玩落去，所以……

遊戲呢，我就唔會放棄住嘅，但我諗我一定會等佢更新完、搞掂啲 Bug 先再玩；想入手嘅朋友或者可以照買照玩、撞下手神，我其實都有懷疑過係咪我臭手，先玩到咁多 Bug 出黎……

我原本真係好想一氣呵成玩完呢隻 Game 架…… /_\