作為一個 JRPG 愛好者，我對 Falcom 呢間公司真係心存感恩，因為佢以往嘅遊戲通常都唔會令我點失望；相比起《伊蘇》系列我更加偏愛《軌跡》系列，可能係因為故事劇本偏向沉重、懶係史詩式宏大世界觀咁，《空軌》《碧軌》雖然故事獨立，但係成個《軌跡》系列係共享同一世界觀的，而角色亦會交替出現，呢種設定亦係我熱愛呢個系列嘅原因。

我好記得《閃軌 1》2013 年推出時，我買完遊戲之後一日就要飛倫敦，原本打算上機瞓覺，但係遊戲好玩到結果我成程機都拎住部 PSV 喺度衝劇情，然後《閃軌 1》以一個非常令人吃驚嘅劇情發展完結咗。

然後，去到《閃軌 2》，主角去搵返失散嘅 VII 組同伴，開始去嘗試干涉共和國＆帝國軍嘅戰爭，呢方面又有貴族派搞事，嗰方面又有獵兵團同埋遊擊士嘅私怨，劇本宏大到我睇少一秒都會 Follow 唔到。

結果，《閃軌 2》去到最尾，我最愛嘅前輩死咗，而主角發現敵人中佬鐵血宰相原來係自己親生老竇……劇情發展到咁樣，我都知一定會出《閃軌 3》。

Hello Daddy orz

黎到《閃 3》我原本以為今集係《閃軌》最後一集啦，但係玩到一半，唔對路，遊戲頭 3／4 時間都喺度揭露緊《空》《碧》兩代留落黎嘅伏線；對於玩開《軌跡》嘅我黎講當然係好開心的，可以見返啲前作角色出返黎，又終於前人而家嘅發展係點樣，作為承上啟下嘅作用，呢一點係做得好窩心。

見返放盪王子出場＋聽到子安武人自戀嘅聲音＋佢又開始出黎自彈自唱，真係好開心好治癒！

招式同《空之軌跡》時完全一樣（心）

赤髮重劍遊擊士阿加特大哥今集都有登場，同緹妲關係開始明朗化 LOL

Falcom 吉祥物算唔算係歷代角色？LOL

之但係，《閃》自己本身嘅故事呢？你解緊前作伏線嘅同時，《閃》劇情嘅伏線就留得更多！我又唔可以話佢個故事拖長黎做，因為每件細微嘅事又真係同劇情有關係；不過，得返咁少篇幅，到底黎緊個《閃軌 4》係最終章啦，真係黎得切將今集嘅謎題一一解開嗎？

同埋，畢竟黎到第三集啦，官方都擺明車馬係唔會理會新玩家感受的，未玩過《閃1＆2》嘅朋友就麻煩等到 3 月及 5 月，因為到時呢兩集會喺 PS4 出高清版～如果未玩過就直接開《3》嘅，絕對會比啲人名同埋劇情搞到一頭霧水。

不過，對於我呢啲 Fans 黎講，當然是好開心的；雖然今集明顯地 Feel 到官方於遊戲前半部花太多時間去建立新 VII 組嘅關係同牽絆，所以去到劇情後半部非常趕，資訊量爆炸，所以玩落其實有少少攰（抖）

新 VII 組嘅牽絆：花咗遊戲好長時間去建立

好老實講，其實我覺得今集「將黎恩變身成為軍校分校教師，再引導一班新嘅學生」呢個設定有少少畫蛇添足，明明用返原有 VII 組班底繼續開始劇情都講得通，而家夾硬用半集遊戲時間，做到新學生同黎恩好似好 Friend 咁，我只能夠講一句「只要你接受了這種設定」就唯有默默硬食啦……

即係例如ミュゼ成日挑逗黎恩做咩啫……

舊有班底成為配角了

雖然一開始我對角色嘅分配有疑惑，不過令我真係腦力大爆炸嘅，絕對係「死人都叫返生」呢個設定。《閃1＆2》入面我最鍾意嘅角色クロウ，第二集佢死嘅時候我真係喊濕半邊枕頭，劇情話佢比「緋之騎神」刺穿心臟喎，即死啦係咪？雖然唔捨得呢個角色，但係起碼佢咁死法我覺得合理，同埋呢個劇情發展好有《軌跡》嘅味道吖。

點知，黎到今集，我頂你個制，一句「騎神起動者有再生能力」就無啦啦令クロウ復活返，咁點呀？黎恩都係起動者喎，咁所有起動者出黎群毆單挑、其他人買定離手算啦？咁點解要出兵打生打死呀？死完可以返生嘅話，呢個故事可以點樣埋尾呀？點解唔可以乾脆啲呀？

還返啲眼淚比我呀！！

忠嘅原來係奸嘅，死咗嘅又會返生，真係睇到我上氣不接下氣

不過…都有開心嘅地方，例如可以用返以前嘅角色

戰鬥方面就不過不失，維持《閃1＆2》嘅水準，喺戰鬥流程方面依舊流暢，絕對唔會悶；今集仲多加咗 BP 系統，可以用每場最多 5 個 BP 點數去進行戰術，例如係三回合不受傷害、五回合加 ATK 等等，呢個新系統簡單易上手，呢一點要讚。

BP 點數：見右上角，目前為 1

對敵人破防一次，就加一點 BP

今集嘅「騎神戰」戲份多咗好多（應該去到《閃4》會更多 LOL）至於你問我騎神戰好無玩？我只會答你，呢個系統似乎都仲係喺好初步嘅構思，騎神弱點不外乎頭、肩、身、腳咁，只於搵中弱點狂攻就必勝，零難度可言；如果以戰鬥樂趣黎講就麻麻地啦，不過劇情大過天，劇情有咁嘅需要就算啦～

弱點：黎黎去去幾個位

今集：學生都可以用機甲兵對戰

不過，又咁講啦。
雖然我上面好似批評多過讚，但係，你問我嘅，我真係好鍾意《軌跡》，所以愛之深責之切，我對《閃3》要求係好高的，鬼叫系列作以前嘅作品水準咁高咩。

遊戲方面係用心嘅，同以往所有《軌跡》一樣，遊戲 Opening 堅持用動畫表達，而戰鬥動畫亦落重本，個個角色都有特技。

呢兩個腹黑怪真係令人又愛又恨，變態皇太子！！

傳說中嘅鋼鐵聖女

《閃3》嘅 Card Game 小遊戲都幾好玩，雖然難度都係太簡單……

今集係咪令我失望？咁又唔會，雖然有好多令我無解嘅地方，但係作為起承轉合、衝向結局嘅作品黎講，《閃3》喺劇情交代方面依然係做得十分詳細，劇情末段喺火車上面見到《碧》嘅兩位主角羅伊德同埋艾莉終於放監（？）揮手送別主角嘅畫面，簡直仲令我鼻頭一酸添！

不過……
一氣呵成寫到呢度，突然，有少少語塞。

下一集，就真係終結啦。

今集去到最後，黎恩暴走、放蕩皇子架紅色飛行船比皇太子細佬裝咗炸彈引爆，生死未卜；留比玩家嘅，係一堆問號，我一方面好想知道遊戲會以點樣嘅形式埋尾，但係，知道今年秋天，就要迎來呢個系列嘅完結，我個心，始終都係有啲失落。

2018年秋天，《閃之軌跡 4》，我默默倒數等待遊戲的到來。

本文很長，在此多謝各位閱讀到此的朋友。