係2018年1月22日呢一個日子，陳威霖（遊戲ID：Tom60229，以下簡稱Tom）拎到《爐石戰記》既世界冠軍。係2014年挑戰世界大賽失敗之後，為左再次挑戰世界大賽呢個舞台，佢成為左職業電競選手，努力咁奮鬥左三年，宜家總算係修成正果。

不鳴則已，一鳴驚人，不飛則已，一飛沖天

係2014年既時候，Tom仲係初出茅蘆個陣，佢參加左第一屆既世界盃台灣區資格賽。由於遊戲入面既資訊無宜家咁流通，好多野都要靠自己摸索，再加上當時咁啱係《納克薩馬斯》改版後無耐，所以仲未有所謂既主流出現，更加考驗選手既牌組構築能力。

當時Tom使用一副加入左「奈幽之卵」既巨人術打敗左當時非常出名既實況主Amaz，係第一場既比賽入面，佢只要打出手入面既「壓倒性的力量」就可以擊敗對手，但佢無選擇咁做，而係先用天生技抽牌，好多人以為佢係度嘲諷對手，而事實上係後來既訪問入面佢有解釋係因為個時既比賽，牌組並唔會公開，對手並唔會知道佢既牌組入面到底有放啲乜，因為佢盡量唔想令人知道佢有放第二張「壓倒性的力量」，所以先抽牌，睇下有無其他辦法可以拎到勝利。

係承受住比賽既壓力之下仲會諗住點樣隱藏資訊，單憑呢一點已經足夠証明Tom係處理細節上面有幾咁細心。

以下為Tom同Amaz既比賽相關記錄：

決賽係由Tom對決FrozenIce，Tom最終成功以直落3:0完勝既姿態拎到佢人生中第一個爐石比賽既冠軍。亦因為佢拎到呢個冠軍，所以得到左資格去參加當年既Blizzcon年度大賽，仲比閃電狼睇中左，簽左佢做職業選手。從來無諗過要做電競選手既佢就咁踏出左人生既新旅程。

以下為Tom同FrozenIce既比賽相關記錄：

不斷既努力 無盡既戰鬥

係第一次參加既Blizzon年度大賽入面，Tom表演未如理想，佢亦表示係個次失敗之後，佢既唯一目標就係要重返呢個舞台。雖然《爐石戰記》入面所佔既運氣成份的確有唔少，但係佢一直都有一個諗法就係：唯有將細節做到完美，將失誤降到最低，先至有資格去講「運氣」呢兩個字。Tom認為其實係比賽入面玩家經常都係因為失誤或者大局觀而輸，並唔係輸運氣咁簡單，只不過一般既人睇唔出咁解。所以Tom經常都會去檢討自己，睇下自己到底有無做到最好，佢亦曾經有感而發咁講：「這遊戲真的是越玩越會覺得，怎麼會有人敢說自己很了解這個遊戲，難到不行。」

作為一個職業選手，努力既練習係基本中既基本，而呢個世界並唔係話你越努力就自然會越多回報，係2015同2016年呢兩年之間，Tom打入左無數次既資格賽，亦都拎到唔少國際比賽既冠軍，但係始終係官方舉辦既賽事都係差一啲，無辦法返到佢心目中想去既舞台。係2016年尾，佢甚至考慮過要唔要放棄繼續做職業電競選手。

到左2017年，因為賽制既修改，各賽區積分最高既選手就可以得進入世界賽既資格，對於Tom黎講，係千載難逢既機會，因為積分係可以靠投入越多既時間同努力，長期咁累積落黎。Tom亦都曾經講過2017年會係佢作為一個職業爐石選手全心全力咁投入既最後一年，為自己既人生負責，而Tom既努力亦無白費，佢得到左佢應得既回報，就係難以動搖既亞太區積分第一名，只能講呢個賽制對Tom呢種穩打穩扎既選手真係再適合不過呀。

而時隔三年後，重新再企係呢個世界大賽既舞台，Tom亦都完成左佢最想要既目標，得到左最高既榮耀。 Tom既例子真係一個好好既教材，佢完美咁演繹左咩叫凡事都做到最好，準備充足，咁機會一到就自然係你既世界。

以下係Tom對Fr0zen既世界大賽決賽既記錄：

有趣雜談

如果有留意開既話其實會知道Tom被稱為「大哥」。曾經有人作左一首幾有趣既打油詩：一二三起手，打牌靠右手，你沒有猜錯，六零二二九。就係用來描述Tom既強運，另外仲有幾有趣既完美咁將一首歌變成Tom版，個首歌就係吳克群既為你寫詩，由於為你同威霖既普通話發音好相似，所以可以將歌入面所有既為你改成威霖，有興趣可以跟住唱就會明笑點係邊度。