今次要同大家分享既係響天梯入面存在已久既海盜戰，係新版本之前，佢算係一副比較常見既快攻牌組，但係經過左熾炎戰斧既削弱，新版本新牌既加入，海盜戰就漸漸淡出左，但係事實上海盜戰仍然係可以響天梯入面佔一席位既，今次介紹既海盜戰就加入左少少新版本既牌，但係核心就同以往一樣，相信大家如果有曾經接觸過海盜戰既都可以好快上手。

牌組運作基礎

呢一副海盜戰既最佳起手就係恩若司的大副同埋凱雷希斯親王，無以上既牌就選擇全換，前期如果能夠搶到場優係最好，白沫狂戰士如果能夠準時出場就多多利用手下同武器去交換對手既手下，令到白沫狂戰士既攻擊力大幅上升，柯爾克隆精英同埋炸雞勇者仲有奧金收割斧都係好好既收頭利器，由於宜家呢個版本好少人會放拆武器既手下，所以可以放心咁利用海盜既效果盡量提升武器既威力去控制場面，戰士既優勢就在於佢武器相比其他職業多，可以比較容易用武器去換取場面優勢，而且當你有高攻武器在手既時候，對手仲需要考慮你既斬殺線到底有幾高。

牌組介紹

單卡分析

恩若司的大副算係呢一副牌組入面最好既起手，可以直接提供一把可以斬三次既一攻武器，而且佢係海盜，一出場就可以拉出海盜派奇搶傷害同場面。如果對手唔係快攻牌組，係早期就可以靠呢一手搶走唔少血量。

凱雷希斯親王既效果非常強大，所以越早抽到佢就越好，雖然如果要用佢就要放棄其他兩費既牌，但係由於海盜戰2費本身會選擇既牌並無不可取代性，所以呢一副海盜就嘗試用親王去加強一下海盜本身唔太強既體質。相信大家應該都體驗過有親王加成同無親王加成既牌組係戰局中既優勢交換有幾可怕。

惡毒的召喚師係新版本所加入既手下，佢既效果係出場時由牌組隨機翻出一張法術，隨機召喚一隻同呢張法術相同費用既手下，而呢一副牌組本身就因為落左親王而唔會落其他二費既牌，本身會放既法術限制又多左，就索性放棄放低費法術，直接只放戰士最高費用既法術去令到惡毒的召喚師既效果最大化，唯一既缺點就係如果惡毒的召喚師出場之前，牌組入面唯二既法術都已經抽上手就會令到惡毒的召喚師成為一張白紙。

新版本所加入既戰士專屬法術，本身既效果好一般，但係可以靠裝備武器去升級，海盜戰既武器數量都還可以，所以升級唔會太難，而且本身呢張法術既重點不在效果，而在於放係牌庫入面去配合惡毒的召喚師，所以呢張法術留係牌庫入面其實係更加好。

小編閒談

海盜戰係天梯存在既時間實在係非常長，而且一直都有唔錯既表現，其實海盜戰唔一定要跟呢副牌既套路，砌返以往版本既海盜戰亦無不可，所以成副組牌可以調整既空間非常多，大家都可以嘗試下砌一副屬於自己既海盜戰玩下。