爐石出到而家，曾經有好多版本推出。而呢啲版本全部都係魔獸世界入面一啲好有特色既事物黎，並且用卡牌既方式係爐石入面展現出黎。而兩集既《爐石版本史》，小編將會同大家回顧一下爐石由出到而家既一啲版本同果個版本既特色！

「死亡之聲」版本 ─ 納克薩瑪斯

納克薩瑪斯呢一個地方係巫妖王旗下冰巫「科爾蘇加德」既據點。而呢一個版本，亦一如有大量不死族既天譴軍團咁，推出左大量既「死亡之聲」手下同納克薩瑪斯入面既BOSS級怪物卡牌。而呢個版本亦係「死亡之聲」卡牌最受歡迎既版本！

當中最受歡迎既「死亡之聲」卡牌就好似「瘋狂科學家」、「伏晨」同「史塔拉格」咁，好多獵人、法師都會用上呢幾張卡牌。除此以外，呢個版本其中一個傳說手下「瑞文戴爾男爵」更加可以將場上所有手下既死亡之聲觸發2次，係果個時期，「瑞文戴爾男爵」大概係4費區間內最致命既手下！

「機械」版本 ─ 哥哥打地地

哥哥打地地，大概係最多人會唔明點解既版本名。但佢實質既意義呢，其實就係哥布林打地精！作為魔獸世界入面工程系既兩大翹楚，屬於佢地既版本當然唔會少得大量既機械同零件亂飛啦！所以係哥哥打地地呢個版本入面，有大量既機械手下出現，仲有專屬於哥哥打地地版本既「零件卡」出現添！

而呢啲「零件卡」，係會通過手下既戰吼、死亡之聲，或者係其他獨有效果取得，可以用作增強手下既能力！

「龍與戰吼」版本 ─ 勇闖黑石山

黑石山呢一個地方，充滿住黑鐵矮人、龍類，同火元素！而結合各類型既戰吼，就成為左呢一版「龍與戰吼」版本！

講得係「龍與戰吼」版本，當然少不了大量唔同既龍類同戰吼啦！回顧當時，最受歡迎既龍類就有可以將下個龍類手下消耗降低既「龍之伴侶」；手中有龍類就可以造成3點傷害既「黑翼墮落者」；同回合結束時將手中卡牌消耗全部降低1點既「索瑞森大帝」！

「激勵」版本 ─ 銀白聯賽

銀白聯賽係銀白十字軍係進攻冰冠城塞打敗巫妖王前既一個團體演練，而當中有大量以軍團、騎士為主題既卡牌推出！「激勵」呢個效果，更加係呢一個版本度推出添！

係呢一個版本,最受歡迎既卡牌莫過於係「審判者瑪瑞爾」啦！「審判者瑪瑞爾」可以將原本非常雞肋既英雄能力變到非常強大，基本上係果陣戰士、牧師既必備之物添！

「考古」版本 ─ 探險者協會

「考古」版本既探險者協會，當中有好多以矮人為題材既卡牌推出，因為矮人呢一個種族，係非常之鐘意周圍探險同尋寶，所以更組織左「探險者協會」係世界唔同地方到處發掘失落既寶物添！係呢一個版本，大家可以搵到好多好有考古特色既手下，當中更有強大既協會人員加持添！

當中最受歡迎既卡牌，不外乎係「布萊恩‧銅鬚」同「里諾‧傑克森」啦！「布萊恩‧銅鬚」既被動效果，係可以令佢在場時打出既手下戰吼都可以觸法2次，配上強大既戰吼，將會令有戰吼發揮更加既影響力！而「里諾‧傑克森」呢，就係果個時後大後期單卡牌組既神物黎，因為「里諾‧傑克森」可以令度過前中期非常虛弱既英雄回滿血！令已經用盡全力企圖擊殺玩家既對手前功盡棄！