自從《真三國無雙8》公佈今集會係 Open World 玩法之後，吸引咗唔少朋友嘅注意；但係，喺遊戲公開佢嘅遊玩影片之後，又令唔少朋友打退堂鼓，不少睇過戲片或者試玩過《無雙8》嘅人更加係不斷高呼「這不是無雙！！」之類嘅哀號。

咁到底真相係點呢？

喺我離開獵人集會地區之後，我拎住隻新鮮熱辣嘅《無雙8》打算一試，喺 Load 碟嘅時候，老老實實，雖然聽聽埋埋嘅評語似乎都唔係好好，但係，當我仲係小學生嘅年代已經有沉迷玩《真三國無雙2》，之後無論係《戰國》或者《三國》甚至連 PSV 隻《無雙 Next》我都係一集不漏咁玩哂！算唔算係 Fans 我唔知，但係我對遊戲本身，仲係有所期待的。

終於入 Game。

然後我半夜三更望住段 Opening 動畫，即係趙雲無啦啦出水芙蓉，無啦啦 Show 肌肉，然後好似集合天地靈氣、七粒龍珠嘅力量咁樣開始變身……我意思係著衫，我已經好唔爭氣咁大笑咗好耐。

但係我又好認真，無嘢架，《三國無雙》系列之所以紅咗咁多年，除咗遊戲本身好玩，其實都仲有賴同人業界嘅推動，不斷發掘遊戲當中可惡搞嘅素材。KOEI 一黎段 OP 動畫已經帶比我咁大歡樂，OK，於是我笑住開 Game。

唔再係以前「武將傳」或者「年代紀」咁玩，《無雙8》故事模式當然係按照慣例，由「黃巾之亂」開始玩起。一開始配合年代可以選用嘅武將分別係曹操、孫堅、劉備，隨住解決任務觸發劇情，就可以慢慢解鎖埋其他角色。

雖然我一向不是很喜歡用力量型的黃蓋叔…

不過，實際遊玩過之後，我只能默默承認：This is not 無雙。

無雙一向以爽快打擊感、極速千人斬作為遊戲賣點，但係《無雙8》裡面，雖然以 R1 搭配按鍵嘅各樣特殊技係有落過心思，但係就已經唔再係以前嗰種招駁招、清晰爽快嘅打擊感了；與其話佢係「無雙」，我反而覺得今集似乎嘗試緊將遊戲轉型為動作歷險遊戲啊……

迴避：居然唔係以前咁樣 L1 避，而係 LTE 出現限時三角按鈕叫你避，但避完又無咩特別效果……orz

敵人唔再係人海戰術，疏疏落落咁樣，真係感覺 not so 無雙

但係重點來了：點解本文題目我會形容《無雙8》係《武將教條》呢？其實唔單止令人聯想到《AC》，仲有啲位令我聯想起《FF15》添！

首先今集個 Open World 地圖係唔符合遊戲比例咁大，大到我一路騎馬，一路完全體會到三國時代啲武將，原來要行八千里路雲和月先可以出征打仗，呢件事係幾咁回歸歷史，幾咁反樸歸真，幾咁一帶一路LOL

地圖大到……OK，想表現地大物博係咪？

因為跑步同埋騎馬加速都係會扣氣的，所以交通時間就更長了。不過，到達大城鎮之後可以解鎖成為快速傳送點，城鎮入面可以補給，而因為地圖好大，所以為咗了解周遭環境，玩家要按 R1 射袖箭（誤）飛上瞭望台進行「鳥瞰」黎開發周遭地圖……喂，我玩完《AC Origins》明明同我講刺客起源係埃及人，而家你係咪要改寫劇本話我知刺客祖先 Actually 係三國武將啊？LOL

老老實實，呢個設定可以令人不想起《刺客》嗎？

至於騎馬可以 Set 路線圖然後「跟隨道路  Auto Run」、仲有同人地交談或者接受任務時一定要落地呢啲設定，無論係黎自咩 Game 都好，都有種似曾相識的影子；換個角度諗，《無雙8》今次咁樣重新定位遊戲，算唔算係集百家之大成？LOL

不過刷素材呢一部份就真係……有少少……蠢。首先呢個素材顯示方式真係 Very《FF15》，好彩孫堅入夜之後唔駛開個營帳叫程普佢地煮飯啫。不過，你閒閒地一地都係 10 粒素材，要我原地兜圈逐粒踩逐粒執嘅感覺真係唔夠爽快、略嫌婆媽，喂，話哂我都係一國大將啊，你任務叫我執甘草，個國家是咪窮到連叫小兵出去收集資源都唔得啊？《MHW》都有得派貓啊 LOL

不過又咁講啦，如果大家唔好當佢係《三國無雙》黎玩，而係當成一個以三國時代作為藍本嘅史詩式國家奮鬥史暨動作歷險遊戲黎玩嘅話，話唔定就有新一樣嘅感受了。你問我會唔會玩落去？都會嘅，始終遊戲仲有好多未探索嘅劇本，亦未將我一向鍾意嘅角色解鎖，所以……輕鬆玩依然是 OK 的，特別係就黎過年，買返屋企年假玩，其實都係唔錯選擇～

重點係：唔好當佢無雙，唔好當佢無雙，唔好當佢無雙。很重要所以要講三次。

Price.com.hk 《真・三國無雙 8》中日英文合版價格查詢