【暴雪特約】爐石小技巧(二) ─ 組牌技巧

上集同大家講到爐石入面一啲成就同任務既資訊，令各位新手玩家可以快速拿取金幣黎令自己變強，而今集，小編就會同大家講下一啲組牌既技巧，同而家最受玩家們歡迎既套牌既使用技巧啦！

牌組的前中後期

牌組既建立之前小編係文章都同大家講過一啲前中後期既卡牌概念，帶大家重溫一下，簡單啲黎講就係打牌整體既節奏會偏重於遊戲既邊一個階段。

前期既牌組多數係各個玩家社群都會被稱為快攻牌組，務求係遊戲既頭3-4個回合打走敵方英雄大部份既血量甚或乎結束遊戲。但若果唔成功的話，將會變得非常乏力甚至可以話係已經輸左。

中期牌組則係渡過遊戲前期後，以大量體質優秀既手下填滿場面，係對手無清場卡牌下完全壓制敵人既一種手段。

後期牌組則係前中期都積累手牌，再用法術等等清走對手前中期所打出既牌，消耗對手既戰鬥力最後拎到勝利。

該選什麼類型的牌組呢？

講到呢度，好多新手都會疑惑到底自己應該用咩類型既牌組好。小編就建議新手如果係卡牌種類比較少既，可以唔洗諗直接用快攻牌組就可以。因為中後期牌組對於特定傳說牌同史詩牌既需求幾大，如果大幅缺乏核心牌，中後期牌組將會退遠遠唔及其他玩家。但如果你既牌組係比較齊全既呢，則可以多多考慮中後期牌組，因為呢個種類既牌組多數比較穩陣。

要注意的地方？

講到要注意既地方，新手最多就係砌牌時會忽略牌組既消耗同埋續航力。

一副牌組既消耗，好決定你所打既流派係快攻定係後期。好多新手係砌牌時都會唔理三七廿一將傳說牌或者係強大效果牌都先塞去牌組入面，但就忽略左牌組本身既流暢性，令到自己係連牌都未打到，就已經因為前期過份疲弱既被對手毆打至死。所以小編建議新手們都可以先玩快攻既原因，除左係可以快速拎到場面優勢外，另一個作用就係可以令新手們了解前期既重要性其實係大於卡牌本身既優勢。

續航力方面，一套牌既抽牌速度可以話係最影響牌組穩定性既一個項目黎。好多新手係建立牌組時，都會忽略左牌組本身既抽牌速度，而令自己好容易變到一張手牌都冇。而冇手牌最大既缺點，就係令場面既適應性變到極差。好似當你0手牌既時候，抽到既反而係數值參差既低費牌一張，結果就變左打左等如無打既局面，失去還擊之力。