最後一集既爐石英雄傳，今次小締將會同大家講一下最後一個大家都會好易唔明既職業，而呢一個職業，亦係術士英雄古爾丹既原始職業─薩滿。

薩滿職業以至於詞彙，係日常生活到遊戲界都唔常見。如果要同一第個詞彙去形容薩滿，大概就會係祭司了。至於薩滿呢個職業係祭緊啲乜？跟住落黎就等小編為大家解釋下啦！

元素專家 ─ 薩滿

薩滿話得係元素專家，佢梗係同大自然係好有關係嫁啦！但同德魯伊唔同，薩滿專於既係大自然中既元素，好似地、火、水、風既元素咁。所以大家都會係薩滿既套牌入面，搵到好多呢類型既元素法術同手下。

除此以外，薩滿仲係一個擅長用武器去作戰既職業添！但就同聖騎、戰士等等唔同，薩滿作戰時更加在用元素既力量去強化自己既武器，好似大家所熟知既「石化武器」同「風怒」咁，都係薩滿們用黎強化自己武器既法術黎！

索爾？他是誰？

索爾呢個角色，如果大家有接觸魔獸世界的話，應該都唔會對佢感到陌生。索爾從部落既大酋長，直到變成而家潛心修補死亡之翼對世界造成傷害既世界級薩滿，都為艾澤拉斯擔當住好重要既角色。

而至於索爾，佢既本名其實叫高爾。索爾呢個名只係佢年幼時人類幫佢改既姐。相信有睇過魔獸世界大電影既人大概都會知，其實佢就係杜洛坦最後一刻放左落河既獸人小朋友，最後由人類收養左，更碾轉接觸到薩滿教仲學左薩滿既巫術添。

薩滿爐石介紹

薩滿呢一個職業，其實都係一個幾岩新手玩既職業。因為薩滿既可以用手下，又可以法術同武器，算係一個手下、法術，英雄拎武器做場面控制都可以既一個全面職業黎。雖然話薩滿係非常之適合新手玩冇錯，但其實薩滿呢，係一個易學難精既職業黎。咁講係因為薩滿雖然手下、法術，武器三修，但同時亦表示左佢既多變會令套牌產生更加多既變化，令新手係砌牌既時候需要考慮更多。

而除左手下、法術，武器三修外，超載呢個預支法力水晶既系統亦係薩滿所獨有。薩滿既超載係令玩家可以比正常低費用狀態下預早一回合召喚強大既手下或者係使用法術，但薩滿下個回合就會有若干既法力水晶會被鎖上。而呢一個超載制度就可以令玩家比平時更早取得戰場上既優勢，對新手而言呢一個將會係一個好大既優勢黎。但同時呢個超載制度亦帶黎隱憂，就係下一回合玩家既法力水晶將會被鎖上。如果玩家前一回合所造既優勢被對方化解，而又冇「解鎖法力水晶」既卡牌，將會整整一回合處於失之中。所以新手玩薩滿的話，將會係一個好好既學習機會黎。而薩滿既超載，風險其實變相比術士為低，所以較為適合比新手試玩！