王、世界BOSS、任務同死亡騎士英雄都同大家講過啦。咁係爐石卡牌人物故事解說最後一篇入面呢，小編就想同大家講下係爐石入面咁多把武器之中，到底有邊幾把武器係最知名最有趣既呢！

霜之哀傷

霜之哀傷呢一把武器，係一張死亡騎士牌，只能夠透過阿薩斯或姐阿福斯取得。而呢把武器既有名之處，莫過於佢係由鼎鼎大名巫妖王─阿薩斯所持有啦！如果係魔獸既玩家，可能會對呢一把武器既認知比較多，霜之哀傷呢一把魔劍歷史耐到基本上無法被考究，但最後佢係俾仲係聖騎士既阿薩斯發現左，但因為霜之哀傷既詛咒太強，令阿薩斯本人自己都墮落左成死亡騎士，最後仲成為左魔獸同爐石既一代知名武器。

而係爐石入面，7費5/3既武器乍看之下體積好似唔多強勁，但佢利害之處其實係可以將曾經擊殺既手下，係呢把武器破爛既時候召到場上，係遊戲既中後期有住巨大既影響力。

灰燼使者

而灰燼使者則係同霜之哀傷有住巨大既關連。係魔獸世界入面，基本上呢一把係與霜之哀傷係故事上係完全對立既武器；一把係極端邪惡既劍，而一把就係極端神聖既劍。灰燼使者呢把極端神聖既劍，係由聖騎士傳說卡牌提里奧‧弗丁所持有，所以點解提里奧死後會將呢把武器自動裝到玩家既手上。

同霜之哀傷一樣係5/3體質，但就少左被動既特效。如果成張卡牌咁睇，灰燼使者大概係提里奧‧弗丁卡牌既副產品，係6/6聖盾嘲諷既提里奧陣亡後，玩家可以提起5/3既灰燼使者擊殺對方既手下做個場面控制，對遊戲既中後期一樣有住強大既幫助。

血吼之斧

血吼之斧大概係爐石入面費用最高昂既武器了。7費7/1既血吼之斧，係戰士手下「葛羅瑪許‧地獄吼」既武器黎，最後流落到地獄吼個仔卡爾洛斯既手上。7/1既血吼之斧獨特之處係佢攻擊手下時，折損既係係攻擊力而唔係生命值，所以7費變相黎講係可以俾戰士玩家選擇用黎控制場面，定係直接擊打對方英雄。7攻既武器係爐石入面非常稀有，如果血吼之斧經過手下/法術既特效強化，仲可以連續痛擊敵方英雄。從前則係有一個武器戰流派，係靠血吼之斧將敵方英雄痛毆致死。

薩弗拉斯

呢一把充滿火焰既錘，係爐石入面係火羽之心戰士任務既獎勵品。但如果細心留意的話，其實薩弗拉斯呢一把武器係同炎魔拉格納羅斯既手錘黎。所以點解佢會令玩家既英雄技能變為炎魔拉格納羅斯既回合特效。

呢一把武器係爐石入面，其實都非常常見。因為每回合2費就可以對隨機敵人造成8點傷害，係遊戲既中後期其實係非常致命既。爐石入面大多數手下生命值都低於8點，所以裝備左薩弗拉斯的話，敵人愈拖得耐，輸既機會就愈大。所以點解戰士既「城牆」卡組，係中後期會咁難打。