大家好，今天要同大家介紹嘅係啱啱贏左《爐石戰記》Best of Hong Kong W1冠軍，阿Kin所推薦嘅牌組，卡札牧。

牌組介紹

阿Kin指，呢套牌組係佢最鐘意嘅牌組，而佢亦都有用呢套牌組嚟出戰《爐石戰記》Best of Hong Kong嘅比賽更順利拎到冠軍！
阿Kin為我哋介紹呢副牌組時指，如果唔係對住翠玉德嘅話，基本上打任何職業任何嘅牌組都會有50%以上嘅勝率。佢指呢副牌組嘅最大特點係，如果對住控制系牌組嘅時候，可以好早期就抽到5費嘅傳說手下綑縛者拉札同埋「暗影死神」安杜恩嘅話，理論上就接近必勝啦。
如果是面對快攻牌組嘅話，由於牌組入面已經有好多低費嘅法術牌，例如有1費的瘋狂藥水可以控制兩點以下嘅對方手下來換怪；又有龍火藥水、神聖新聖等解場法術牌。所以只要能抵住快攻嘅首波攻擊，就能輕鬆以中後期卡牌嘅質量差距來壓制對手。
呢副牌組有另一個特別嘅地方，就係好似宇宙流牌組咁，所有嘅卡牌都係得一張。因為牌組入面嘅4費傳說手下卡札克斯以及上述的綑縛者拉札都係要牌堆中無相同嘅卡牌先可以使用嘅。

單卡分析

值得一提係預言者費倫嘅combo，同樣如果在前期就能夠抽到綑縛者拉札同埋「暗影死神」安杜恩嘅話，喺後期配合低費嘅卡牌就能打出超大量嘅傷害。例如北郡教士、光輝元素等。綑縛者拉札嘅0費英雄技效果，加上「暗影死神」安杜恩的效果，再配合預言者費倫的倍增傷害，好容易就做到1TK的效果了。

阿Kin小建議

牌組入面好多嘅小生物都可以更換以應對唔同嘅牌組，例如想比較偏向壓制泄盜戰，可以換入2費的葛拉卡爬行蟹。又或者應對比較緩慢的中後期牌組，就可以多帶一點濾牌卡，以增加抽到牌組重點卡嘅機會。

小編小建議

小編收到呢副牌之後嘗試用佢嚟爬天梯，測試左20鋪成功由R15上到R10，勝率都非常高，但小編認為，呢套牌組唔太岩新手用，因為技術嘅需求比較高，例如鋪場、解場的時機，面對不同場合的應對方法，其實呢D都好需要由好多嘅對戰經驗嚟支持，因為呢套牌組所有嘅卡都係得一張，所以如果出錯牌，或者用錯時機嘅話其實會好頭痛。例如小編對住一套控制戰，喺中前期嘅時候，小編為左加快濾牌嘅速度好早就落左北郡落場，結果比對手輕鬆解左，令到小編後期一直承受牌差嘅壓制而輸左。所以大家必需要注意用呢套牌組嘅話，一定唔可以衝動，要小心落牌嘅節省同次序，另外亦都可以按自己唔同嘅喜好或者天梯嘅狀況來做調整，希望大家可以有所得著啦！