有留意開 Indies 遊戲嘅朋友或者一早已經聽過《夢日記》呢個作品，遊戲當年由 ききやま 用「RPG製作大師2003」獨立創作，當時仲免費公開比人玩，喺網路上絕對係引起一陣哄動，特別係 2ch 上面更加係日日千幾個留言黎討論呢個遊戲。

呢個遊戲有咩咁特別？《夢日記》其實無咩複雜嘅操作，玩家係一個少女，日常生活喺一間普通公寓入面；但係，少女嘅夢境先係遊戲嘅重點。隨住玩家得到唔同嘅道具，少女可以變身成鬼，或者獲得菜刀去殺害夢中嘅 NPC。

就咁聽好似唔知做乜，但實際上遊戲裡面場景同埋畫面嘅表達，都莫名地令玩家感到心理唔舒服甚至感到恐懼。遊戲本身有近 20 種結局，不過好多玩家嘅精神根本無法堅強到可以完成哂成個遊戲，少女夢境嘅音效、畫面，例如係無盡黑暗、不斷閃動嘅電視雪花畫面等等，都會勾起人心中嘅孤獨感同埋恐懼，可以話係精神獵奇遊戲嘅經典。

今次介紹呢個《YUMENIKKI –DREAM DIARY-》係日本角川將舊版《夢日記》重新包裝改善之後推上市面嘅作品，預計 2018 年 2 月 23 日於  STEAM 上架；好消息係遊戲今次係同時對應中、英、日文等多國語言，對於唔想分神睇外語嘅朋友黎講應該係賣點！遊戲售價則為 1,980円（税込）或 US 19.99。

舊版遊戲畫面

舊版遊戲畫面

想率先感受下遊戲中嘅氛圍？大家可以睇下官方 Trailer：