《逆轉吉原》原本係手機遊戲，2015 年時以《男遊郭》之名登錄 PS Vita，無諗過事隔三年，呢個遊戲居然會再落埋 Switch 仲要中英日文對應！

遊戲大綱其實就幾老套嘅，將吉原（日本高檔風月場所）變成全男班，玩家飾演嘅女主角就逐個角色攻略，玩法方面就係傳統嘅 AVG 遊戲，選項影響劇情發展以及角色好感度，而每個角色都會有 1～3 種結局咁樣。

《逆轉吉原》本身聲優班底陣容好強大，森久保祥太郎、鳥海浩輔、置鮎龍太郎、野島健兒、黑田祟矢（攻略桐生一馬嘅機會黎啦！）不過，如果劇本無改過嘅話，根據我當年玩《男遊郭》時嘅記憶……呢個遊戲嘅劇本其實都幾狗血，犯駁位超多，所以每一幕我都玩得好開心，因為我吐糟吐得很歡樂～LOL

劇情有幾狗血？舉個例：女主角經常去搵嘅男角色，原來係自己母親當年在外邊生嘅仔，所以係女主角失散嘅哥哥所以戀情不被允許……之類嘅情節，要幾老套有幾老套，遊戲入面要幾多有幾多～LOL

既然我講到個遊戲咁樣，你可能好奇點解我仲要介紹？No No No，男性玩家可能難以明白，但對女性玩家黎講，玩呢啲女性向遊戲嘅心態，其實唔一定係為咗啲咩「少女浪漫嘅幻想」（當然偶爾係會有扣人心弦嘅劇本出現啦），不過，大部份時候係當個遊戲係一部輕小說咁睇，而更大部份時候，係為咗吐糟遊戲入面唔合理嘅故事安排！簡單黎講，吐糟係女性向遊戲嘅樂趣啊～LOL

所以，作為 Switch 上少有嘅女性向遊戲，仲要中英日文三語對應，我始終都覺得呢隻遊戲有遊玩價值架～

名字：《逆転吉原～菊屋編～》
售價：1,980円（税込）
日期：2018年01月25日 下載版限定
對應：手提＆TV Mode

《菊屋篇》Trailer 如下：