勁好玩解謎動作冒險遊戲《蠟燭人》終於正式於 PS4 發售！！

可能好多人都未聽過《蠟燭人》（Candleman）呢隻 Game，其實佢係舊年年頭 Xbox One 獨佔既其中一隻極優質小品遊戲，　憑藉原創既獨特玩法再加上優秀動態光影表現，仲有簡單但係精彩既故事劇本係歐美地區贏得極多掌聲，黎到今日終於可以係 PS4 上面玩到啦！

係遊戲入面玩家係扮演一碌蠟燭，需要係黑媽媽但係危機四伏既地圖前進（其實係架大船入面黎），係途中只可以靠點燃自己所產生既火光黎照明，但因為係劣質蠟燭既關係所以最多只可以燃燒 10秒，過時就 GG架啦……。

咁講到明係 10秒超人，所以玩家就要精確咁控制點火同熄火既時間，趁住中間果半秒時間記住啲位置黎前進。遊戲目的除咗每關抵達終點之外，仲會有點燃坐落係地圖各處燭台既副任，要點晒每關既燭台其實先係精髓所在。當然隨著關卡推進，需要解開既謎題就會越黎越難，而且亦都會見到製作團隊所花既心思。

今次 PS4 上推出既《蠟燭人》會包含 12 個章節，而每章入面又會細分為 3-5關，總數有 47 關。而且係 PS4 版本會追加「時間挑戰模式」，只要係通關之後進入任何關卡都會見到多咗粒鬼火，你可以當粒鬼火係賽車 Game 既「Ghost Car」，只要你快過佢到終點就會刷新紀錄時間，當然之後粒鬼火就會更新做你既影子啦！