無耐之前先同大家分享完《魔界戰記 5 初心遊戲感想》，今日再同大家介紹另一款戰棋遊戲！

由日本 Radeon Games 開發嘅經典戰棋策略 RPG 系列《傭兵傳說（Mercenaries Saga）》一共推出過三集，當中嘅《傭兵傳說2＆3》曾經分別移植過落電話同埋 3DS；今次官方宣佈會連同《傭兵傳說 1》將三代遊戲一口氣重製，作為佢地公司首個登錄 Switch 嘅作品；呢個合集將於 2018 年 1 月 18 日 喺日本 e-Shop 上架，數位版限定，售價為 1,500 円。

《傭兵傳說》玩法並唔複雜，玩家喺遊戲入面要建立自已嘅傭兵團、亦需要刷裝備去強化戰力以挑戰更高難度關卡。至於招兵買馬返黎嘅隊友都有職業之分，有近攻的戰士、遠攻的弓箭手、或者是進行治癒指令的祭司等等；關卡喺地形變化上面亦都頗花心思，唔同嘅階段差絕對會增加遊戲的難度。種種設定以小品舊遊戲黎講，算係相當多樣化！

每次見到啲粒粒人仔我就聯想起 RO

作為戰棋遊戲，可以隨時 Save / Load 實在係太偉大啦（笑） 因為我並無玩過呢個系列嘅原作，唔知佢嘅關卡入面除咗寶箱之外，仲會唔會有啲咩隱藏要素呢？

比大家睇下《傭兵傳說 3》當時嘅宣傳影片：

作品名稱：マーセナリーズサーガ クロニクルズ（Mercenaries Saga Chronicles）
發售日期：2018.01.18（DL版限定）
官方售價：1,500円（税込）