《Cube Creator》系列原本係 3DS 嘅 Download 版遊戲，呢隻小品遊戲喺 e-Shop 上架之後，連續半年都處於銷售榜嘅頭十位，人氣有返咁上下！遊戲推出時，正值《Minecraft》大受歡迎嘅時候，不過《Minecraft》當時並無登錄 3DS，變相就比咗機會呢隻《Cube Creator》喺日本極速冒起！
雖然坊間有評語話《Cube Creator》系列嘅畫質同埋玩法，都好明顯地係啟蒙自《Minecraft》……不過，唔理啦，任天堂見佢喺 3DS 市場成績咁好，剛剛宣佈將佢落埋 Switch，新作品起名為《Cube Creator X》，2018年4月26日正式發售！
講返遊戲本身：《Cube Creator X》嘅玩法有三種：
（1）探索模式：經營角色日常生活、包含探索、育成等等部份；
（2）創造模式：玩家可以建築自己嘅世界，自由發揮；
（3）場景建設模式：每個關卡任面有既定地形同埋機關，玩家要挑戰喺各個關卡入面起嘢出黎
《Cube Creator X》新追加咗一個叫「Home World」嘅元素，好似打 RPG 嘅據點咁樣，玩家喺呢個地方唔會遇上敵人、亦可以同其他村民進行交流或者物資交換；玩家如果要轉換遊戲模式，都需要黎到 Home World 切換。
而今集喺系統上面亦有改善，例如係角色搬運物資嘅負重量、點火時風向同天氣嘅影響，呢啲細微嘅元素，都為遊戲添加挑戰性同埋趣味（我個腦浮現咗 Zelda 嘅遊戲畫面！LOL）
遊戲目前公開嘅資料唔算多，不過預計同 3DS 版玩法差唔多！
有興趣嘅朋友可以睇返 3DS 版嘅介紹影片：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。