之前我地就報導過騰訊拎咗全球大熱既大逃殺遊戲《Playerunknown’s Battlegrounds》（PUBG） 中國獨家代理營運權，除咗 PC 原版之外佢地仲會開發《PUBG》手機版。
最近手機版就宣布會展開先鋒測試，不過原來正版《PUBG》手機版唔係得一隻，分別係《絕地求生：全軍出擊》同埋《絕地求生：刺激戰場》，二隻遊戲都分別宣稱自己係「第一正版」同「唯一正版」！
事實上二隻《PUBG》手機版都係正版，分別係由天美工作室開發並宣稱自己係「唯一正版」既《絕地求生：全軍出擊》；以及光子工作室開發並宣稱自己係「第一正版」既《絕地求生：刺激戰場》，二隻遊戲官方釋出既資料同 PC 版《PUBG》都係咁上下玩法，即係成百人空降落島再周圍執野殺人咁。
一個就話自己「唯一正版」
一個就話自己「第一正版」
最正既就係二隻遊戲都係咁上下時間話搞 Test，《絕地求生：全軍出擊》話會隨機抽4000名玩家進行先鋒測試，隔日《絕地求生：刺激戰場》就話自己搞不刪檔封測預約活動，仲要二隻 Game 都係限定 Android 機添……其實係咪同一班人改個名就當兩隻 Game 咋？
《絕地求生：全軍出擊》官方釋出既畫面
《絕地求生：刺激戰場》官方釋出畫面
就咁睇就好似二隻都差唔多，不過騰訊拎住二隻打正版旗號既《PUBG》就一定掃晒成個大逃殺 Market 架啦，個風又吹得咁熱睇黎都有排玩，咁……幾時到 PS4/Switch 出阿？
VJGamer總編，細細個已經蒲機舖，機齡甚深，熱愛電玩文化。