Square Enix 旗下有唔少細工作室，好似 Tokyo RPG Factory 咁，舊年就推出處女作《I Am Setsuna》（いけにえと雪のセツナ），當時我玩完都有寫過【感想文】，有興趣嘅朋友可以睇下。

《Lost Sphear》（下簡稱 LS）嘅風格同《Setsuna》風格近似，都係走小品型架空世界路線，遊戲玩法係最傳統嘅 JRPG 設定（就係一定要刷地圖、打怪、升 Lv LOL）遊戲一開始最吸引我嘅當然係劇本，Tokyo RPG Factory 喺劇本營造方面非常出色，喺《LS》入面，主角身處嘅世界逐漸消失，而主角為咗阻止呢件事，就同伙伴踏上旅途，希望搵到拯救世界嘅辦法。

當然你可以將主角定位為遊戲中嘅「勇者」，因為佢喺機緣巧合之間，得到一個特殊能力，就係可以將唔同事物嘅「記憶」收集，慢慢將世界消失嘅部份逐啲逐啲咁變回原狀。聽落好似會係一個「打完大佬世界咪無事囉」嘅劇本發展，不過，遊戲個宣傳語句係「要是你所愛的人在你眼前消失的話…」，其實亦暗示咗劇本同埋結局都帶有濃厚憂鬱灰暗色彩（我最鍾意呢啲題材～）

原本的城鎮面貌

城鎮「消失」的部份，需要主角收集記憶，先可以將佢塑造返出黎

「記憶」亦可以用於大地圖上：利用記憶碎片建設建築物，每種建築物都有唔同嘅遊戲加乘效果，例如係喺限定地域裡增加素材掉落率等等

都市人生活忙，未必有時間成日打機，所以好多朋友都減少投放心機去玩 JRPG，其實真係幾可惜。除咗我熱愛嘅 Falcom 出品，其實日本唔少大小公司，都仲係不遺餘力咁去開發各種角色扮演歷險遊戲。《LS》除咗落 PS4 仲同時落埋 Switch，呢個一來係大勢所趨啦（笑），二來，我一向比較鍾意用手提機玩 RPG 的，因為坐車等位都可以玩到。

《LS》喺「劇情提醒」呢方面做得頗為不足，大部份 RPG 遊戲都會喺 Menu 或者係畫面上方會有「主任務提示」之類，更貼心嘅就會喺細地圖上面標示亮點，話比玩家知下一步要做咩；《LS》兩樣都無做到，如果你好似我咁「打開一個遊戲就日日煲」嘅當然無咩所謂，但係假設你工作繁忙，放低個 Game 一兩日，我都幾肯定你會一頭霧水，唔係好知道自己要去邊（汗）

就算可以同隊友對話都無用，因為啲對話唔會比到咩提示你……呢一點，希望 Tokyo RPG Factory 下一個作品會有所改善。

探索畫面：如果放低遊戲一陣，你會完全唔知自己要做咩

場景及畫面方面，遊戲就做得非常精細，以小品製作黎講我幾滿意架！無論係城鎮、室內、或者迷宮方面嘅場景，都做得頗有心思；郊外鄉村嘅質樸、王宮嘅宏大、黑暗迷宮嘅陰森，各個場景絕對各有特色。

流水的質感好柔和自然

地產霸權嘅嘢，去到遊戲世界入面都仲會發生！陰公比成幾舊水瞓膠囊旅館呀～

作為 RPG，可以隨便入村民屋企拎道具是常識！

不過，雖然今次部份迷宮有嘗試加入機關以增加難度，可惜啲機關又真係太簡單了，個感覺有少少多餘，反而只係令我覺得白行幾步路咁樣，倒不如著重增加迷宮複雜性！

去到遊戲後期嘅迷宮，Size 出奇地大，而啲怪物又會過版再生！偏偏迷宮入面 Save Point 唔多，如果無用特別技能加乘嘅話，Save Point 係唔會幫你全回復的！所以後期都玩到幾激氣，因為迷宮入面唔少敵人附有「即死」或者「死亡時自我爆破」之類的效果，其實都幾屈機，係就係可以狂用道具補給，不過喺遊戲世界入面，錢同喺現實世界一樣，都係好難賺的……

打完個迷宮去到 Boss 嗰度已經頻死，你個 Save Point 居然無得全回復，點打啊啊啊～

睇到呢度，係咪覺得呢個遊戲好似玩得好辛苦咁？我又唔會咁認為，因為《LS》想做出「本格 JRPG」嘅效果，而呢一點我覺得佢做得幾成功的：要拯救世界，就要變得更強；而變強嘅路，一啲都唔易。

咁講好似好中二，但係老老實實，正因為遊戲無得調較難度，所以玩家一定要勤練 Lv、勤刷素材同埋錢去加強裝備，其實呢件事係好合理的，會覺得件事麻煩，絕對係因為我被而家啲遊戲縱壞了（笑）

係架，升 Lv 好緊要，因為結局個 Boss 真係好難打，而且會不斷幫自己補 HP，基本上係耐力戰；無咁上下 ATK 同抗性，或者生命值唔夠高，真係好快就會全軍覆沒。以我為例，成個遊戲我都係以技巧戰術衝關的，去到打大佬嘅時候，其實同建議挑戰等級應該差咗 15 Lv 左右。

結果我挑戰咗三次，都係極快陣亡，死死地氣返出去練返夠 Lv 先勉強打爆機，係勉強…LOL

離全軍覆沒不遠了……

雖然個 Boss 係難打，不過遊戲個戰鬥系統係好玩的，角色技能要靠平時刷素材去開發、而戰鬥入面亦需要玩家操控角色走位。因為角色每一招嘅攻擊範圍唔同，要點樣一招內最快捷地攻擊到最大量嘅敵人，係戰鬥要注意嘅要點之一；第二個要點就係敵人嘅屬性，有啲敵人（特別係頭目級）係會對「風水火木雷」以及「物理」「魔法」有住唔同嘅抗性或者弱點，稍不留神，連小怪都可以 KO 你。

今集亦繼續沿用《I am Setsuna》中開發嘅「剎那系統」：隨住角色累積攻擊次數，頭頂嘅藍色小燈就會亮起；喺進行任何攻擊嘅時候，同時按下正方形，就會產生威力加乘效果。相信呢個系統應該會成為同系列嘅代表，不過同上集相比，「剎那系統」並無太大變化，不過靈敏性提高，唔會再好似《Setsuna》咁成日出唔到 LOL

練 Lv 之重要性：因為打怪先可以刷素材，而遊戲入面乜都要素材去做的

角色攻擊範圍會以紅框表示

幸運的話或會遇上白金怪：會掉落大量 Exp 及金錢

比較有趣嘅地方係，今集新增了一個攻擊模式：機甲兵。雖然我都好想問做咩最近啲 RPG 愛上玩「機甲」，《閃軌》係咁，而家連《LS》都係咁……唔通係 JRPG 新潮流？（笑）

不過，《LS》似乎就無將戰甲兵呢個設定盡情發揮啦，角色換上機甲後，除咗攻擊力同防禦高少少之外，其實又唔見得有咩特別；而且條技能 Bar 係全部人共通的，好快就用哂啲技能點了。如果「機甲」嘅設定係用黎出超必，我都話你比條咁短嘅 Bar 我合理吖；你又唔係喎！用機甲打大佬，佢咪一樣係絲毫無損！咁即係點啫！LOL

或者機甲嘅最大用處，只係啟動啲傳送機關…orz

睇到呢度，你可能會話：點解好似都係負面評價黎嘅？哈哈，我承認我對《LS》要求有點嚴苛，原因係我由始至終，都對呢個系列抱住好大期望，相信佢可以做得更好。平心而論，相比一年前的《Setsuna》，今集已經進步很多，例如地圖變得更廣闊有趣、動作變得更順暢自然等等，細緻位去到遊戲中使用嘅字型排位，都較上集時有用心過。

至於另一點我覺得要讚嘅，係 BGM。例如 Theme Song 只係選用最簡單嘅鋼琴伴奏，已經具體咁表現咗遊戲中淒冷嘅氛圍：

另外，人設及人物關係亦令我難忘，例如：鄰國王子 VAN 由充滿企圖接近 主角 KANATA、去到將 KANATA 當成摯友，但劇情中段，卻受到黑暗迷惑而將 KANATA 殺害……呢一段嘅心路歷程，做得非常細膩！相比起來，KANATA 同青梅竹馬 LUMINA 嘅感情，我反而覺得刻劃太流於表面了（喂）

至於遊戲中一開始嘅傻小子 LOCKE，一開始我覺得呢個角色好煩，好死小孩，攻擊力又弱！當佢因傷退出隊伍時，我個心當時仲覺得「哦是但啦，無咩所謂」，隨住劇情推進，我甚至有少少遺忘咗有個隊友喺度養緊傷。所以，佢以全新姿態返黎嘅時候，我好慚愧，我好痛心，因為佢已經比人改造成人間兵器，仲比人洗埋腦……我玩到呢度時嘅心情就係，對唔住，好對唔住，點解我居然相信人地會救你，係我害咗你（掩面）

總結黎講，我對《LS》評價唔錯，相比前作進步不少，但仍有改善空間；遊戲系統順暢，升級略嫌廢時，用手提機玩可能會玩得開心啲（笑）但係劇本引人入勝，劇情舖陳合理，遊戲由起始到終章維持同一節奏，至少我玩嘅時候係幾享受的！期待工作室下一個作品。