12月頭推出嘅《人龍極 2》唔知大家爆咗機未？我就二周目緊，希望清哂啲支線！

有玩過 PS2《人龍2》嘅朋友，應該都唔會反對呢一集係《人龍》系列入面非常出色嘅一集，劇本緊湊，伏線一個接一個，唔打到最後一刻，都唔知道真正大佬係邊個！

故事主線：本來已經脫離東城會嘅主角桐生一馬，黎到第二集原本想金盆洗手，但係走江湖嘅嘢，一日洗濕咗個頭，就好難完全脫身，見到東城會內部有人作亂，外面又有關西近江聯合同埋韓國黑幫真拳派想搞搞震，桐生叔寧願意圖犧牲自己，都想幫返舊東家重振門楣。

呢條故事線我覺得寫得相當唔錯，既表現到桐生嘅「義」，亦從女主角薰身上感受到「情」；而桐生叔對遙嘅關懷（例如係面對遙時表情會變得相當柔和嘅動畫表現）、面對敵人來襲時嘅勇武（桐生叔去邊幾乎都係一夫當關架嘛 LOL），對從前兄弟錦山彰嘅懷念同傷痛（單人睇影片時，有條片叫《黑幫》講兄弟反目，到死先理解大家……呢條片桐生叔睇到喊的）以上等等嘅人物表現對比，都為桐生叔建立咗一個活生生有血有肉嘅形象，同埋傳達咗一個訊息：雖然桐生叔有勇有謀，但佢唔係英雄，亦唔想做大佬；佢只係一個面對生活有所掙扎嘅普通人。

而今集女主角狹山薰，我諗係我歷代人龍女主角（雖然唔係集集有 LOL）入面最鍾意嘅女性角色，人靚聲甜呢啲就唔講啦，我好欣賞佢剛柔並重嘅性格。故事一開始原本都有覺得呢個女仔太執著衝動，但係隨住劇情發展，佢一路跟住桐生，一路成長、變得穩重成熟，唔單止被桐生嘅仁義所吸引，亦放低自己對黑道嘅芥蒂。

除此之外，本為孤兒嘅佢，去到後尾先知道自己身世、同龍司以及真拳派嘅淵源，仲發現自己親生老竇，居然係自己黎到東京之後一直幫助自己嘅刑事瓦次郎！有關薰嘅故事情節，編排得極為引人入勝，但又不失自然；最後瓦次郎為咗保護佢而死嘅一幕都搞到我有少少鼻酸。

強制同薰合照（笑）

至於遙嘅部份，我衝遊戲時就已經同朋友講「桐生叔為咗佢好，應該供佢去外國讀書算啦，反正搞夜總會咁賺錢～（笑）」畢竟今集入面遙嘅戲份唔算多，都係做返啲被綁架等桐生救嘅角色，而今集重製新添加嘅「滿足遙撒嬌願望」嘅支線，好唔好玩就見人見智，我就玩到躁躁地，見到遙踩地嘅時候真係忍唔住講句「死女包」！雖然可能有部份玩家係遙嘅 Fans，不過得罪講句，呢個角色去到今集有少少薄弱，返向日葵返得好呀～LOL

點解要睇我賭錢呀？邊個教你架？仲要扭哂屁屁咁，邊度學返黎架？

戰鬥方面就有讚有彈，《人龍極 2》繼續用緊「人龍」系統，咁好老實講，舊版《人龍2》的確有啲歲月啦，我都唔係好記得當時嘅打擊感係點；不過，如果拎返《人龍 6》黎比較（呢一代第一次應用新人龍系統），人龍系統以及成個戰鬥模式的確變得非常成熟了！記得《人龍 6》時，動作嘅流暢度認真一般，而黎到今集呢，無縫地圖呢一點真係要加分，樓梯可以上、人地 Office 可以亂入，最難忘係上某大廈天台，居然仲見到有聖誕樹裝飾！當時臨近聖誕玩到呢度，心情零舍興奮（笑）

「無縫地圖」喺打交嘅部份就最突顯用處啦，或者應該咁講，一來「可以打爛人地間舖」呢個元素滿足咗唔少玩家嘅破壞王心態（我舉手先），另一方面，戰鬥過程比舊版自然咗好多，自然嘅唔止係動作流暢靈活，而係……即係咁，以前玩《人龍》，有人撩你打爛仔交，只要衝入店舖，敵人就唔會再追；但係，喂邊有黑社會追斬你時，見你行左入 7 仔佢就會唔追架？你走入差館就話啫！唔 make sense 架嘛！而家就無呢枝歌仔唱啦，就算你行左入餐廳門口，班爛仔都仲係可以截住你進行戰鬥的～（掩面）

呢班小混混追到上樓梯，然後用「極」踢返佢落樓

不過去到遊戲中期我基本上爆哂能力值，啲爛仔交真係避得就避；自從開咗夜總會支線之後，我簡直富可敵國，先唔稀罕你成金野郎嗰幾萬 Yen 啊哼哼～LOL

所以我一見到條路有紅色敵人，就會即近去撳附近嘅汽水機，因為喺遊戲中只要同 NPC 或者設備進行互動指令，就會自動 Renew 地圖上面啲敵人位置。雖然打一場爛仔交唔係好花時間，不過去到遊戲中段，成日打爛仔交真係好悶……加上遊戲入面個保鑣支線有超多關，咁既然都要打，我寧願花時間打支線啦，爛仔交就容許我避得就避啦（笑）

保鑣支線－趕走佔據便利店的小混混

劇情入面嘅強制戰鬥，繼續有 QTE 同埋過場動畫嘅元素（QTE 即係即時反應按鍵），通常打頭目時會較常出現。講到頭目，當然要提鄉田龍司，龍司應該係人龍系列入面繼真島以外最愛桐生叔嘅角色啦，打咗佢幾次都唔死，去到邊都見到佢咁濟，陰魂不息到呢～（笑）

頭目戰時，扣除敵人大量 HP 之後連按指令會進行致勝一擊

龍司雖然係敵對角色，不過佢唔係一味得個惡字，佢係霸道，但係佢有佢做大佬嘅原則：
（1）唔打女人：結局時雖然比薰用槍指住，喺未知道對方係自己妹妹嘅情況下，都完全無傷害薰嘅打算
（2）唔蝦細路：近江為左打倒桐生，綁架咗遙；龍司最後幫手救返遙，並認為欺負小孩子太卑鄙
（3）識英雄重英雄：桐生同龍司其實各自有過機會，可以喺對方體力停下時了結對方，但係兩人都無咁做；作為「龍」，就要認認真真、完全對等地決勝負先叫光明正大，同埋咁先尊重到對方同自己。

可能正因為以上佬佬地又好老套嘅原因（笑），所以我對龍司從來都無厭惡嘅感覺，其實仲幾期待佢每次出場帶啲咩火花比桐生叔！

至於重製版入面最明顯嘅新增元素，絕對係真島戲份 Up，以及多咗「風化島」同埋「真島建設」兩個經營策略系支線。雖然兩樣嘢其實分別係《人龍0》等作品中出現過，唔算係新作嘅玩意，不過正因為兩個支線推出之後大受玩家歡迎，所以可以繼續喺呢一代玩到當然係好消息吖！

而今集「風化島」入面，《人龍0》嘅 No.1 小雪已經變身為「雪紀」成為夜總會 Four Shine 老闆啦！對於舊玩家黎講，呢個設定相當親切，雖然唔知點解過咗 20 年，雪紀仲係好似食咗防腐劑咁無乜點老過，仲係當年個傻大姐……不過最好笑嘅莫過於玩到「風化島」後期，真島會出現返，仲會為 Four Shine 營業現況進行直播旁述，玩到我好開心！

雪紀 BB

至於「真島建設」就真係識玩，因為遊戲中可以獲得嘅角色頂多都係 SR 級數，但係如果你肯課金呢，就可以喺 PSN 買 SSR 嘅角色黎用！睇黎單機遊戲都要玩到課金嘅習慣，唔再係《Assassin’s Creed》嘅專利……LOL

不過我就無課金買角色卡，一來真島建設就算拎到好角色，都需要技巧去玩先可以拎到 S 級；而每一場防衛戰鬥其實都幾花時間，又要控制啲角色走位，敵人攻擊又幾浪幾浪咁黎……結果最後賺到嘅錢同 EXP 又唔算多，所以我一周目時就無擺太多時間去經營真島建設了，留待漫遊時再慢慢煲吧～（雖然真島建設首主題曲好洗腦好好笑 XD）

地下街方面，賭錢嘅部份一向係我嘅弱項，所以我就唔講太多獻醜了～不過，唔知有無朋友同我一樣，覺得今集鬥技場好似易打咗？定還是因為我去到觸發鬥技場支線嘅時候，桐生叔已經練爆哂技能咁濟呢？善用桐生叔儲氣重攻擊再配以極，其實又無我一開始想像咁難打～（我打 Hard 難度架吓）Anyway，鬥技場我都係玩得幾開心的，因為戰勝咗嘅角色有部份可以加入「真島建設」架 LOL

至於小遊戲方面，我諗，可能因為我打機麻麻，SEGA 俱樂部入面嘅 Virtual Fighter 同埋 Virtual On 我覺得好難打……勉強過到 Easy 之後，我就無就挑戰 Normal 了。至於 Golf、Dart、棒球呢啲常有項目就玩慣玩熟，無話太大特別，至於「鼻孔噴奶＆北風與太陽」同埋「攝影」兩個玩意呢……

「鼻孔」呢個小遊戲對於我呢啲女性玩家黎講真係好爆，睇住桐生叔充滿鬥志咁去小解，如果遊戲失敗就垂頭喪氣咁講一句「くそ」，如果勝出就自己喺度沾沾！笑到我呢！同埋小便就小便啦，乜野力度同水量呀？如果我水量拎唔到「S」級，係咪代表我唔夠尿急先？LOL 成件事真係想惡搞桐生叔，乜嘢形象都無哂吖～（話雖如此，我係企喺廁所門口狂飲茶儲 Quota 去玩「鼻孔」的 orz）

影相嗰度我就唔係好識欣賞啦，呢個部份我諗真係主力針對男性玩家；唔好誤會，我嘅意思唔係指男玩家先會對呢個部份感興趣，攝影入面要揀啱選項去增加女角嘅好感度，呢個玩法其實我係覺得好玩的，雖然我成日會想揀啲明知會令佢不快嘅選項（笑）不過，點解我話唔識欣賞呢？嗯，因為兩位攝影女主角嘅外表都唔係我鍾意嘅類型～

不過為咗完成獎盃目錄，我都係有玩咗一段時間的 LOL

萬聚期待嘅真島線，其實比我想像中少嘢玩，無支線任務、無成就解鎖、連攻擊模式都係得好少變化！加上真島本身配備匕首「櫻花蒔繪鬼炎」嘅關係，所以亦無得話隨街拎其他武器使用。雖然我明白真島呢三個短短嘅章節，目的唔係為咗遊戲性，而係一種劇情嘅補完……不過，如果真島有一兩個專屬支線可以玩下就好了！

然而，真島線嘅劇本係寫得極好的，主線部份詳細交代咗真島離開東城會嘅原因，但呢部份唔算最重要呀（笑）最重要係真島於 18 年後再返到蒼天堀，原本只係去整體院「暢快館」院探聽情報，無諗過居然同《人龍 0》嘅 女主角牧村實再次相遇。

有玩過《人龍 0》嘅朋友，一定唔會忘記當時 24 歲嘅真島，同而家嘅真島，係兩個非常唔同嘅形象。被稱呼為狂犬、不受控制、我行我素嘅真島，喺人生入面惟一一次願意去疼惜同保護嘅人，就係當年仲係失明嘅牧村實。

兩人當年歷盡患難，牧村實嘅清純，令真島喺佢面前放下了枷鎖；然而，為咗小實好，真島喺《人龍0》嘅結尾，完成自己任務就離開咗，堅持唔透露自己嘅身份。一來佢知道小實對自己只係感恩嘅心，而唔係愛情；就算係愛情，自己都唔會係比到幸福佢嘅人。

本身呢一段劇情我已經好鍾意，因為咁樣嘅安排對於真島同小實黎講，的確係最好嘅結局；但係，始終係留低淡淡嘅遺憾；而呢個遺憾，喺今集《極2》入面，作為向玩家交代又好，向真島交代都好啦（笑）18 年後，小實已經結婚生仔，但仲係選擇留喺「暢快館」工作，目的，係想再見當年嘅恩人一面。

喺唔知道真島身份嘅時候，小實無意中講起，對「18 年前的恩人」嗰份感恩嘅心，亦講起自己而家生活美滿嘅事；而小實手上，仲依然戴住嗰隻充滿住真島回憶嘅手錶，但係錶帶爛左，佢就配唔返啦。

最後，真島離開暢快館，留下一句「妳把我 18 年的疲勞都一掃而空了」；而即將隨家庭離開日本嘅小實，就在事後收到了一份禮物，就係隻手錶嘅原裝錶帶。

我無諗過玩真島線會玩到淚流滿面，但係可以用呢一個方式為「真島＆實」嘅故事劃下真正句點，我認為，同時都係今集《人龍 2》最精采嘅地方之一。

呢個結尾，完得好呀！

玩完《極 2》又黎到老問題：到底有生之年，我地有無可能見到真島嘅個人遊戲呢？唔係配角、唔係主角之一、而係獨佔一個遊戲！唔知有無可能呢？總括黎講，《人龍極 2》我評分接近滿分，同舊作相比有明顯進步，新玩家固然有佢地嘅感受，而舊玩家玩呢個重製版嘅時候，至少我都會有「好似打緊一個新遊戲」咁嘅體驗。作為重製遊戲，絕對係一流之作，強烈推介未開始落坑嘅朋友玩一次吖！