數完最伏遊戲就梗係黎返啲開心野，2017年 VJGamer 編輯部認為最好既十大遊戲，我地各編輯都有自己既心水，唔知同你地又係咪一樣呢？唔講咁多立即去馬啦！
2017 年度十大最佳遊戲 By 森麻 (排名不分先後)
- Horizon: Zero Dawn
- Outlast 2
- 薩爾達傳說 曠野之息
- Xenoblade 2
- InJustice 2
- Monster Hunter XX
- Cuphead
- Assassin Creed Origin 刺客教條：起源
- Hand of Fate 2 命運之手 2
- Getting Over it 鐵鎚爬山
- Snipperclip (最佳十一)
感想：
2017年屬於極多好 Game 既一年，主因當然係老任新機 Switch 既出現，伴隨著優秀既市場策略令到每個月都有好 Game 出現，雖然部份遊戲例如《Mario Kart 8 Deluxe》長期營運乏力 (例如無去更新新賽道，新車等等)，但係依然係高質湧現既一年，當中更有《薩爾達傳說 曠野之息》呢類極上佳作品出現，實在係機迷之福。
簡略講講各作品成為森麻’s Choice Top 10 既原因。
《Horizon: Zero Dawn》無庸置疑係今年 PS4 上面最出色既動作遊戲，不論構思，畫面，劇情都係頂級大作。《Outlast 2》秉承上集既恐怖感，各方面甚至比起上集表現更佳，仲係少數我真係會比佢嚇窒既遊戲，絕對值得 Top 10。《薩爾達傳說 曠野之息》應該唔洗點講啦，完美之作。至於《Xenobalde 2》真係不枉我等佢咁耐，無令我失望，雖然有唔少缺點 (例如神級導航系統)，但係綜合佢絕對係一隻頂級 RPG，個人黎講對佢評價仲高過 FFXV。《InJustice 2》出既時候我已經大為欣賞 (詳文)，仲拎埋「The Game Award 2017」最佳格鬥遊戲，證明我眼光都唔錯丫！
玩咗百幾粒鐘……瘋狂打撈
《MHXX》今次版本落足心機，係螳螂同隻噴射機身上可以見到製作組既心思，之後落 Switch 亦都成功令大部份玩家再次拎起武器，高招！
《Cuphead》因為得 Xbox One 同 PC 既關係香港較少人提及，但係確實係近幾年難得一見既高水準高難度橫向 2D 動作遊戲，絕對值得一試。《刺客教條：起源》(詳文) 雖然角色刻劃就比較弱，但係佢肯走出舊框框去加入自家其他作品元素落去再次賦予遊戲生命呢點已足夠我擺佢入 Top 10。
《Hand of Fate 2》今年超級黑馬作品 (詳文)，嚴重被 underrate 之餘連宣傳都無乜，極建議大家入黎試下！《Getting Over it》又叫做鐵鎚爬山，簡單既設計但係步步都觸目驚心 (仲難到嘔電)，連公認操作強到爆炸既 Faker 都曾經比佢難到，小遊戲可以做到咁真係好勁。
最後點解會有隻《Snipperclip》做最佳十一名呢，因為近幾年我認為只有佢先可以真正做到遊戲既本意：與眾同樂。淨係呢點已經夠啦！ (仲可以練EQ)
2017 年度十大最佳遊戲 By 神婆（排名不分先後）
- Persona 5
- NieR: Automata
- 伊蘇 8
- 閃之軌跡 3
- 人中之龍 極2
- Assassin’s Creed: Origin
- 薩爾達傳說 荒野之息
- 大逆轉裁判2 －成步堂龍之介的覺悟
- BanG Dream! （App）
- CHUNITHM STAR（街機）
與另外幾位編輯唔同，我比較偏好玩 JRPG，《Persona 5》雖然係 2016 年尾推出嘅遊戲，不過既然佢拎咗《The Game Awards 2017》Best Role Playing Game，我就將佢擺埋入黎今年個 List 啦！《Persona》系列一直都係高水準之作，《P5》我基本上搵唔到一個地方去批評，充滿期待咁開 Game，極為滿足咁爆機，如果未玩嘅朋友，信我，《P5》真係好好玩。
2017 年第一隻令我驚艷嘅遊戲，係《NieR:Automata》。一來灰暗而沉重嘅世界觀設定，真係好合我口味（因為我一向唔係好鍾意 Happy End 嘅劇本 LOL）二來，遊戲嘅藝術意味極高，場景、配樂、對白用字，甚至連遊戲字體，全部都係構成遊戲美感嘅一部份。如果講喜好，呢隻絕對係我嘅 2017 Top 1！不過，戰機部份操控有待改善，地圖標示亦唔夠清晰，期待《Nier》第三集會做得更好。
《伊蘇 8》之前我寫過詳細 Review 文讚咗一輪，有興趣嘅朋友可以去睇下（笑）
《閃 3》因為上有前傳，後有續集，今集簡單黎講就係維持水準，不過不失，期待 2018 年《閃4》，到時再寫篇《閃》嘅總感想文吧～
《大逆轉裁判2》係 3DS 嘅老牌作品了，玩法變化不大，不過案件依然有趣，休閒遊玩一流。
至於《薩爾達》同《刺客》總編森麻已經提過，這裡就不著墨太多了。
《人龍極2》一如既往的好玩，認真當中有惡趣味，以「人龍系統」進行嘅無縫場景及戰鬥，亦應用得比上集更順暢自然！今次 HD 版新增嘅「真島篇」雖短，但劇本用心，交代了真島 20 年前嗰段無開花結果嘅緣份，玩到我眼濕濕呀（掩面）OK 我知道桐生先係主角……
推介手機 Game《BanG Dream》當然有我個人喜好私心，但以音 Game 黎講，佢 Server 穩定、畫面高質、而且仲會定期更新原創或 Cover 歌曲，真係無得彈；不過判定方面目前仲係被不少玩家批評「太 Harsh 了！」咁樣，呢一點我都用咗好長時間去習慣 LOL
最後就係香港好似未引入嘅街機音 Game，SEGA 廠下嘅 CHUNITHM STAR，今年去東京嘅時候一玩就驚為天人，唔單止要按音準、睇音快，雙手仲要舉高放低做撥動嘅動作，有日本網友當時笑說：玩家全部恥力認證！歌曲由同人 Indie、動畫、聲優、Game 歌到東方、J-POP都有，仲有原創歌添，各位去日本旅行嘅朋友，請務必去試玩吓呀（笑）
2017 年度十大最佳遊戲 By 阿九（排名不分先後）
- 仁王
- Assassin Creed Origin 刺客教條：起源
- 薩爾達傳說 曠野之息
- Super Mario Odyssey
- Splatoon 2
- PlayerUnknown’s Battlegrounds 絕地求生
- ARK: Survival Evolved
- Ghost Recon Wildlands
- The Evil Within 2
- Injustice 2
就算好多人話《仁王》遊戲模式抄《Dark Souls》 又好，主角造型抄《The Witcher》嘅 Geralt都好，但光榮對改篇日本戰國嘅歷史同寫故事嘅方法係完勝佢被疚病之處。
老總森麻話《刺客教條：起源 (ACO)》話主角刻劃比較弱，呢點係絕對認同，但《ACO》對整個刺客世界可以話係一支「續命針」。由《 AC 3》之後，掉底左好幾年嘅「第一文明」呢條故事線，終於喺《ACO》中開始整合，咁當然係令到一班 Fans 肯再比機會 U 記。
講開 U 記就講埋《Ghost Recon Wildlands》，3 月出 Game 嘅時候真係對唔住講句「隻Game係咪未整完架？」因為變成開放式地圖需要載具穿州過省，但載具操控系統奇差，飛行載具甚至去到一個失控嘅狀態，如果唔係近期嘅「Predator」任務引我回鍋都唔會再比機會佢。
《薩爾達傳說 曠野之息》同《Super Mario Odyssey》兩隻老任省招牌作，除左話比全世界知輸「機體性能」唔代表部主機就冇能力做到好 Game，亦同時令玩家著眼點落返去遊戲嘅遊玩性而唔係畫面質素。《Splatoon 2》除左延續第一代吸納「射擊苦手」呢個遊戲群之外，亦成為 NS 出機潮嘅第二浪，雖然好多 Hardcore 射擊 Game 迷可能早就放低左，但仲有大量玩家依家都仲追佢嘅 Fest 嚟打緊。
將「大逃殺」拉到網絡遊戲世界，而且開展一個新嘅遊戲競技模型，《PlayerUnknown’s Battlegrounds 絕地求生》喺發售後被唔少外掛玩家影響，但年尾喺 Xbox One 平台發售之後，又已經係另一番境況，而且《PUBG》熱潮已經延續到手機平台。下年嘅「大逃殺」真係可能無處不在。
毒性同《Minecraft》不惶多樣，《ARK: Survival Evolved》加埋合作狩獵同科幻呢兩個要素，落埋家用機平台之後，每晚都唔少玩家一齊玩屎呢？
《The Evil Within 2》的確同之作嘅受注目程度差好遠，但係相對下接近三上真司嘅舊作品風格。
《Injustice 2》要講嘅都比森麻講晒，我都冇乜補充。但有一隻遊戲雖然營運已經三年，今年可以話係超爆發嘅一年。《怪物彈珠(台版)》除左更新進度喺今年經已同日版同步之外，部份嘅合作活動接近同步進行，而且仲獨家拎埋《一拳超人》引到日版玩家得個恨字。但到 2018 會唔會再有突破，咁就要睇下 XFLAG 呢間公司仲有咩絕招可出啦。