擁有特別玩家群既《Pokemon GO》(你明架啦)，佢地既營運團隊宣布由即日起 iOS 版本《Pokemon GO》內置既 AR 功能將會升級做「AR+」。需求亦都唔過份，只要你所使用既係 iPhone 6s 或之後既 iOS 裝置，係升級做 iOS 11 之後就可以體驗到「AR+」功能。
「AR+」會令到《Pokemon GO》內既寶可夢以實際尺寸呈現返係現實世界度 (即係你電話個 Screen)，例如超大隻會塞住條路既卡比獸，令到你成部電話都係藍色等你以為 Hang 機既吼鯨王 (希望有)，飛飛下既噴火龍咁。同時寶可夢亦都會釘死係固定空間，即係你可以行過去接近隻寶可夢！
拜「AR+」功能所賜，而家會有新玩法。玩家可以靜雞雞咁接近寶可夢，如果佢無發現你的話係可以得到「Expert Handler bonus」，呢個時候出現 Great 或 Excellent 機率會提高，同時玩家會獲得更多 XP 以及星沙。
如果寶可夢出現紅色「！」就代表佢會逃走，不過就算佢走咗都仲有機會係畫面上見到草堆，只要點擊草堆就會逼隻寶可夢出返黎！
營運團隊話今次只不過《Pokemon GO》AR 功能進化既第一步，累績經驗之後會令大家既 AR 遊戲體驗變得更豐富，希望大家期待同記得打卡咁話啵！
VJGamer總編，細細個已經蒲機舖，機齡甚深，熱愛電玩文化。