年齡無返咁上下都唔會識呢隻神級模擬駕駛遊戲《沙幕巴士》(Desert Bus)，因為佢係 1995年對應 3Do 同 Sega CD 既一隻非公開發售遊戲《Penn & Teller’s Smoke and Mirrors》內既小遊戲。咁點解呢隻野係神級呢，因為呢隻 Game 係要你扮巴士司機模擬由美國亞利桑那州城市土桑揸到美國內華達州拉斯維加斯既真實時間 8小時路程，堪稱痴孖筋之作！
當年既畫面
新版畫面……要對住呢個畫面 8粒鐘……
黎到2017年《沙幕巴士》用 VR 形式再次推出，同原祖版一樣大家要係一望無際既沙漠行駛 (連彎都唔洗轉)，過程中係無任何障礙物同風景，當然連對頭車都無啦。唯一會見到既野就係車站，但係車站係唔會有任何乘客的…….。至於原作捱到四個鍾之後天空上面會有綠色不明物體飛過，呢幕唔知會唔會重現喇！
另外當大家以為可以 Hea 係度掛機既時候就大錯得錯，因為本身架巴士有機件問題，會自動偏離公路，一旦巴士駛出公路範圍進入沙漠，就會死火而且無辦法撻得返著，所以玩家必須不斷控制住先得，當然無得中途 Save 就必定架啦，一諗起要帶住舊 VR 8粒鐘就爽！
今次既《沙幕巴士 VR》除咗加入 VR 技術之外，呢隻咁既 Game 竟然可以 Co-op！不過唔好誤會係 4條友輪流渣車，所謂既 Co-op 係指你可以同最多 4位朋友一齊玩，你負責揸車佢地負責做乘客咋，扮演乘客既玩家可以做出揮手、坐同埋對住司機掟錢……如果大家想用生命挑戰呢隻 Game 可以去下面 Steam 傳送門，遊戲而家已經推出並免費下載。
