有玩過《FF15》嘅朋友，相信對遊戲最難忘嘅其中一部份，絕對係每次開飯嘅時候，四眼廚娘伊格尼斯（イグニス）每次拎出黎一道又一道嘅料理。記得當時同朋友夜晚一齊開 PS4 Party 衝關，每次見到遊戲中精緻又像真嘅料理，就一定有朋友忍唔住去煮宵夜！

咁，表達自己對一個遊戲嘅愛，有好多方式；有人出同人本，有人出 Cosplay，而香港網友「Honey And Toast」就選擇咗另一種非常有愛又實用又有才華嘅方式，就係將《FF15》入面共 109 道料理全部神還原，仲將烹飪方法製成繁中、英、日三語對應嘅免費食譜，大方地同所有朋友友善分享！

煮哂 109 樣料理＋影相＋CAP 遊戲入面料理圖做對比＋寫三種語言去製成食譜 PDF。呢份心機，我除咗佩服，都係佩服！

PDF 食譜一打開，你話係原宿一間 Cafe 嘅 Menu 我都信吖！

連料理喺遊戲入面嘅價錢「Gil」都有一一表列清楚，超有愛

Honey and Toast 仲有影低自己烹飪過程，要煮到遊戲中嘅料理，似乎唔再係咁遙不可及！

選用嘅都係喺超市、街市容易買到的食材，非常平易近人啊～

仲有一樣超有心機嘅事，就係網友將遊戲中每樣料理都有 Cap 圖

然後煮完完全跟返遊戲料理嘅擺碟，連條菇點擺都跟到足呀（掩面）

寫到呢度嘅時候，要學《孤獨的美食家》咁講一句：肚子餓了……

由計劃、買材料，去到實踐下廚、拍照紀錄等步驟……我實在唔敢想像「Honey And Toast」總共花咗幾多時間去完成共 109 道料理，不過本人透露，總材料費應該花費咗差唔多 HKD 31,500（大驚）

如此花心機、如此有愛嘅《FF15》食譜，網友係選擇：免費提供比所有網友下載的！呢份對遊戲嘅愛同堅持，我係真心感動的，所以，可以比更多朋友遇到呢份食譜就好了（笑）

如此精美嘅食譜，你可以不心動嗎？尊重網友版權和心意，呢度我就唔放上食譜下載嘅連結了；想要食譜嘅朋友，快去 Like 網友的 Page 下載吧！

【Honey And Toast Facebook Fans Page】
【Honey And Toast 日語對應網誌】（有佢試作菜的紀錄喔！）

本文章已獲「Honey And Toast」專頁授權