《戦場のヴァルキュリア（戰場女武神）》曾經係 SEGA 嘅看家 RPG 系列，第一集於 2008 年於 PS3 上推出嘅時候大受好評，不過，系列作近年嘅聲勢似乎大不如前，一來遊戲系列唔係出得好密，二來就係遊戲質素真係每況越下……

今年年頭推出外傳《蒼藍革命之女武神》，我一開始都幾有期望，點知結果玩到好失望……有興趣了解嘅朋友可以參考返【蒼藍革命之女武神 遊戲感想】一文。

不過 SEGA 依然係充滿幹勁，剛剛就宣佈會於 2018 年推出正傳《戰場女武神 4》，對應 PS4 及 Switch 平台，咁按 SEGA 近年作風，應該好大機會有埋中文版添！不過雙平台就唔係同步推出，PS4 推出日期為 2018.03.21，Switch版就預定夏季發售。嗯……兩個平台分開兩個時間黎賣真係好選擇嗎？

遊戲背景為架空世界觀，主要圍繞共和國《聯邦》以及君主國《帝國》於大陸上嘅戰爭

男主角係典型正直＋負責任＋熱血嘅戰隊隊長

女主角就少少傲嬌，係男主角嘅好拍檔

畫質單靠 Trailer 評價似乎唔太公平，為咗配合故事中嘅年代，今次遊戲全部係以手繪風作畫，再將 2D 畫稿以 3D 動作呈現；係好定唔好，真係要見到遊戲畫面先知。

寒極絕地裡面，等待住主角群嘅係咩危機？

其實啲 RPG 真係唔駛夾硬整感情線架（喂）

SEGA 可唔可以喺 JRPG 市場搶返一席之地，可能就睇呢一舖啦！雖然《蒼藍》我玩到一肚火，不過今次再出正傳嘅話，我都仲係會想玩，睇下佢整成點都好吖！

最後為大家送上遊戲首個公開影片：