近期極受玩家歡迎既《PUBG》香港都有唔少人玩，不過鄰近經濟強國就無咁好彩啦，事關早幾日中國音像與數字出版協會遊戲出版物工作委員會 (即係負責遊戲既單位啦) 官方網站遊戲產業網發表咗一篇名為《對大逃殺類遊戲總局業務主管部門的基本態度》文章，主調就係「鼓吹屠殺，國內遊戲企業不宜安排研發、引進此類游戲」，亦即係隨時無得玩！

事源係《PUBG》既大熱令到唔少中國遊戲商想開發 (定「參考」)《PUBG》類型既求生互殺遊戲，不過估唔到會比政府下禁令，雖然而家《PUBG》仲可以玩到，不過真係唔知捱到幾耐……。而根據呢份文件指「對於大逃殺這類鼓勵殺戮、尤其單純以殺死其他遊戲玩家扮演的角色為手段實現最終目的的遊戲，總局明確持有否定態度，將難以獲得出版運營許可。」，唔比你整就梗架啦，不過最絕係後面果句「不宜安排研發、引進此類游戲，不提倡以測試此類游戲方式吸引用戶，同時政府不建議，電子競技、直播等平台為此類游戲提供宣傳推廣。」，即係連播都唔比你播阿！

呢單野好似淨係關鄰近經濟強國事咁，但係大家都知而家香港咩環境架啦……會唔會遲少少燒埋我地呢邊都係未知之數。不過又講返轉頭，其實有幾多隻對戰遊戲唔係鼓吹緊殺爆對面……就算 Mario 都叫你踩死隻大佬啦下話！