大家好，嚟到第二個星期《爐石戰記》Best of Hong Kong嘅冠軍選手牌組介紹。
今個星期嘅冠軍選手喺 － TaSa＃4999！而我哋今日將會介紹佢拎嚟參賽嘅其中一副牧師牌，「大大的」。大家係咪覺得Tasa改呢個名好得意呢？其實呢套牌組概念用嚟應對依家嘅Meta係好有效㗎，我哋一齊睇下吖。

牌組概念

大家唔好見到套牌有咁多大怪就以為呢套係一套後期型嘅牌組，其實佢嘅鋪場能力都相當高，牌組係控制牧嘅其中一個分支。
主要手段係用巴奈斯效果特召高費手下、暗影精華嘅另類加速、『無盡之怒』亞煞拉懼嘅每回合召喚、無盡奴役嘅配合造成場優，最後用『暗影死神』安杜因combo斬殺對手。
由於牌組入面有大量嘅防守類型法術牌，例如暗言術的痛、死、懼，龍火藥水等。所以抗快嘅能力好高。中後期大量優質手下站場換怪，令到呢副牌組打即使面對Token德或者Token薩亦有相當唔錯嘅效果。

單卡分析

頭先所講嘅主要combo入面，巴奈斯佔咗一個好重要嘅地位，因為佢只需要4費就可以落場，開始發動呢副牌嘅優勢。咁所以當起手決定留、換牌時一定要將佢放係最優先既爭取目標。只要前期準時放到佢出嚟，然後再用無盡奴役復活佢嘅效果1/1手下嘅話，基本上就會拎到一個超大嘅優勢。當然如果巴奈斯T4出來召到亞煞拉懼嘅話，小編就覺得超完美啦。而由於巴奈斯嘅技能係隨機拉一隻手下，所以牌組內手下嘅數量唔會多，而且全部都係高費手下，希望以此達到最大效益。睇到呢度大家可能會話咁咪好有機會出現手上只有高費手下而令前期開幕無小怪站場既情況囉？其實係前面我哋已經有提到呢套牌組入面有大量嘅防禦卡牌正正就係希望用嚟應對呢類問題，而整體嚟講成套牌嘅水晶線同卡費平衡亦做得相當到位。

此外，小編覺得另一張必需要提及嘅卡牌就係暗影精華。牌組入面有各種卡牌可以配合暗影精華打出唔同combo從而獲取一定優勢，例如召到巫妖王、伊瑟拉嘅話，就等同跳費加速拎到佢地嘅死亡騎士卡同夢境卡。複製出來嘅手下除咗可以提前使用其效果外，更可作為一個使用無盡奴役嘅伏筆，召喚一隻正常血量攻擊力的正品。

文中多次提及嘅無盡奴役當然亦係呢套牌組入面不可缺少嘅強大核心之一啦，暗影精華同亞煞拉懼嘅複製品都要靠佢嚟變返隻正品出嚟作戰㗎，試諗下喺一場對戰入面同一隻傳說手下可以出現多次，一時係被複製出嚟，一時又被復活返，又或者掙脫琥珀咁啱發現多次，你係對手都咪話唔頭痕。

由於暗影精華同無盡奴役都係呢套牌組嘅key card，所以入手嘅時間性好重要，如果唔係急需用暗影靈現來換解場卡嘅話，例如換縮小藥水配合暗言術．懼清場、用瘋狂藥水捉對手嘅死聲怪等，就盡量用佢嚟換入key card備用，又或者係抽唔到嘅時候起碼可以用作保險手段，避免咗「唔準時」嘅情況出現。

小編小貼士

由於牌數限制問題，有啲法術卡只係落咗一張，所以幾時交出就好可能係整局勝負手嘅關鍵。例如暗言術：痛用嚟打聖、打薩嘅時候要留嚟解魚人隊長，打德魯伊就要忍手留嚟解兇惡幼雛。千祈唔好因為前期比其他站場手下壓制就將珍貴嘅防禦卡用咗。小編經常見到有玩家被對手呃出解場卡然後輕鬆帶走，呢個係控制套路最容易犯下嘅錯誤，大家要謹記呀！