黎到左下集嘅「爐石牌桌知多少」，咁小編就講解埋淨番底落黎嘅冒險篇章牌桌同資料片牌桌到底有咩彩蛋啦！冒險篇章牌桌呢，就包括左「納克薩瑪斯、黑石山、探險者協會，同卡拉贊」，而資料片牌桌，就包括「哥哥打地地、銀白聯賽、古神嘅暴風城、加基森大街、安戈洛歷險記，同而家嘅冰冠城塞。」
冒險篇章牌桌 ─ 納克薩瑪斯
納克薩瑪斯呢個地方喺魔獸世界入面，係巫妖王嘅手下 ─ 冰巫科爾蘇加德嘅據點。但雄霸一方嘅巫妖王同佢嘅天譴軍團，又點止死靈士兵咁簡單呀。當中仲有好多其他種族嘅軍隊同兵器，而呢D特徵，都一一刻左喺爐石牌桌上面。好似左同右上，會見到好多綠色瘀泥，呢啲就係巫妖王嘅其中一種生化武器 ─ 瘟疫。而左下角嘅蜘蛛蛋，就係代表其中嘅地穴甲蟲兵。而右下，就係唔同作用嘅水晶〈好似講師拉祖維斯呢個BOSS，打法就係用水晶黎控制佢啲學生黎頂佢可以秒殺坦克既超強攻擊。〉
納克薩瑪斯
互動一覽
左上：骷髏嘅角跟頭可以敲，長禁角嘴中會流出毒液、右眼寶石、毒池有泡、個菇有孢子
左下：孢子有粉、點門中對眼會出現蜘蛛或姐蝙蝠
右上：閘門開關、把手可以轉〈個爐會運作〉
右下：水晶識郁、點爆水晶後長禁會補番
冒險篇章牌桌 ─ 黑石山
黑石山呢個冒險篇章呢，時序對《魔獸》玩家黎講其實就有啲奇怪嘅。因為黑石山呢個副本，係60級封頂年代嘅副本。而納克薩瑪斯則係80級封頂年代既副本，其實就係掉轉左出嘅。但講番先，黑石山呢個地方本身係黑龍們嘅聚集地，所以呢個篇章會有好多龍同操控龍既手下出現左〈當中好多係黑鐵矮人黎，姐係黑色皮嘅矮人〉。而牌桌嘅右上，係黑石山嘅特色建築。左下，係黑鐵矮人族群既鐵砧；右下，就係一堆龍蛋〈啲蛋會爆，係當年一個BOSS既情景黎，踩左蛋，蛋會出怪。炸雞勇者就係當年一個外國玩家惡意搞破壞去踩蛋仲拍埋片，而得出既魔獸獨有文化黎。〉至於編者特登留番左上唔講，係因為左上果把槌，其實係8/8 炎魔拉格納羅斯既武器黎，而佢就係熔心之心既最終BOSS。〈熔火之心位於黑石山副本入面〉
黑石山
互動一覽
左上：鎚會沉落去，依順時針點選符號會出現潛水鏡、黃色鴨仔同骨頭魚
左下：鐵砧鍛造、水桶降溫
右上：把手可以拉、之後操作岩漿池
右下：骨頭識出聲、戳爆龍蛋會有機率出現幼龍
冒險篇章牌桌 ─ 探險者協會
講到探險者協會呢一樣野呢，探險者協會喺《魔獸世界》入面就係一個屬於矮人嘅組織黎，負責到世界唔同嘅地方去尋寶同探險，而尋寶同探險更可以話係矮人族嘅一大特色黎，所以無論去到邊，有尋寶嘅地方幾乎一定有矮人嘅存在。而喺《魔獸》入面，亦有唔同嘅矮人考古場遍佈世界各地。
但呢個冒險篇章出奇嘅係，篇章封面上嘅人物全部都係爐石原創角色，而喺《魔獸》並無出現過嘅。呢類事其實過往並唔常見，因為《爐石》呢隻game本身就係《魔獸》嘅卡牌版黎。而牌桌上嘅地標，不論係探險者協會大廳同考古場牌桌，都係同「探險」會有關嘅大眾野黎，並無太大特別之處可提。
互動一覽
探險者協會大廳
左上：暴龍手、腳、頭都可點，但狂整佢佢會嬲，摸頭會搖尾
左下：地球儀可轉、望遠鏡可校、整爛鏡片
右上：地磚機關、蠟燭熄滅、書識跳、整爛鏡片
右下：水晶球發光、依中上下順序點可以開個棺材、木牌可拆
探險者協會考古場
左上：整爛石柱、同石柱中嘅寶石
左下：藍寶石跨牌桌嘅雷射、尖刺陷阱、飛標陷阱
右上：十字鎬識郁、鎖緊螺絲、吊燈會郁
右下：打爆個罐、金幣識飛、罐內有光
冒險篇章牌桌 ─ 卡拉贊
卡拉贊呢個地方如果有睇之前嘅《魔獸》大電影應該都知，係麥迪文嘅根據地黎。而當中留有好多唔同嘅魔法物品，喺麥迪文死左之後都仲留左喺卡拉贊度。而四個牌桌上面嘅地標都係卡拉贊嘅特色黎，而值得提嘅就係左上角嘅歌劇院，呢個地方喺《魔獸》入面會上演唔同嘅戲劇，而玩家就要參與其中打劇入面嘅角色。當中最慘嘅地方，就係唔同劇本會跌唔同裝。你想要A裝，佢出左B劇本，要等下一個CD黎先可以再打啦！
卡拉贊
互動一覽
左上：箱可開、木炭點火、地燈可點、布幕可拉(出現紫色背景時，上方會出現燈球)
左下：櫃可開、開關可轉(可以操作魔藥樽)、掃帚會橫跨牌桌飛走
右上：桶可開、戳爆燈泡、書同桶子下面既紙符號一樣時，會出現魔法陣
右下：鴨仔可點、羽毛可拉、雞尾酒同把傘可轉、水龍頭可開、水池中會出現詛咒之地傳送門或姐黑暗之門
資料片牌桌 ─ 哥哥打地地
哥哥打地地大概好多人都唔明點解，但其實長寫就係「哥布林打地精」咁解。哥布林打地精喺《魔獸》入面係工程學嘅兩大翹楚，分左做哥布林工程學同地精工程學。當中最大嘅特色係兩面嘅工程道具同時都有可能會失敗，哥布林工程學嘅物品失敗時會爆炸炸自己，而地精工程學就係將樣道具既效果放左落自己身上面。地標方面，左上係《魔獸》入面52區嘅哥布林虛空火箭；右上係地精嘅傳送器；左下係哥布林既火箭同炸彈；右下就係地精死亡射線。
哥哥打地地
互動一覽
左上：雷達會轉、用右下角雷射射中雷達時，火箭會飛走
左下：火爐可開、有機率點燃火箭同炸彈
右上：操作開關、按鈕可禁、地上螺絲可以鎖番佢
右下：可操作雷射砲，會有射中地精嘅聲出黎
資料片牌桌 ─ 銀白聯賽
銀白聯賽係果陣《魔獸》玩家打通完納克薩瑪斯，喺進入冰冠城塞打巫妖王前，一個由提里奧‧弗丁連合聯盟同部落一齊舉辦嘅一個鬥技大會。所以資料片入面有好多銀白之手騎士同競技場相關嘅手下出現。而牌桌嘅地標就好似左上嘅觀眾席；右上既陣營帳篷；左下嘅聚餐點；同右下嘅假人同箭靶咁。
銀白聯賽
互動一覽
左上：花可以摘，同時傳說等級卡入場、敵方英雄遭到高攻攻擊、敵方傳說手下死亡時，觀眾會歡呼。我方傳說等級手下死亡、我方英雄遭到高攻攻擊時，觀眾會姐住塊面
左下：枱上面嘅野可以食、煙囪可拉、可以燒肉
右上：風向雞可轉、旗幟變色、門簾可拉
右下：標靶射箭、假人可轉〈低機率箭會射到假人身上同假人被轉到消失〉
資料片牌桌 ─ 古神暴風城
古神呢樣野喺魔獸入面，最初出現喺安琪拉神廟，當中嘅最終BOSS克蘇恩亦係古神碎碎念嘅主角。而古神喺一樣好似觸手怪物咁嘅物體，可以附身係唔同嘅人身上面令佢好似撞邪咁。但古神係《魔獸》並冇侵入到暴風城，而古神版暴風城亦只係爐石入面古神題材下嘅產物。
古神暴風城
互動一覽
左上：泡泡可戳、觸手可戳、眼睛可戳到佢喊
左下：個鐘怪聲、煙霧消失、觸手可戳
右上：瓦片下有眼仔、變異植物咬人、觸手縮番門內
右下：磚下有孢子、變異植物咬人、變異獅鷲叫聲
資料片牌桌 ─ 加基森大街
「加基森風雲」暴雪又再一次破例造出原創劇情。當然，原創出黎嘅係三大幫派。而加基森，係《魔獸》入面就真係有嘅，但係就屬於黑水強盜而唔係呢三個幫派。
加基森大街
互動一覽
左上(黑謀會)：點建築頂端會成棟郁、長按布幕有紅光飛出黎、敲門把見到紅色法力、多點幾次紙片可以燒左佢
左下：水花四濺、操作吊台能可以吊起帶刺嘅輪胎、可愛嘅娃娃或姐炸彈
右上(汙手黨)：點火爐、火把同煙囪會有火花、敲門會有人出黎望、敲窗會有機關槍或姐紅旗
右下(玉蓮幫)：個窗會發光、識郁嘅箭同燈籠、手裡劍會反光、多點幾次插喺牆上面嘅刀會有龍飛出黎〈隔離廠 Overwatch源氏開大〉、點草叢可以將果實拋去空中玩fruit ninja
資料片牌桌 ─ 安戈洛歷險記
安戈洛呢個地方係40-50級嘅玩家升級地方黎。當中以叢林、恐龍、油沼、火山、同遠古遺跡作為呢個地方嘅特色。而喺佢未出果陣，編者都曾經預計佢係會出大量野獸、死聲卡同類似演化咁嘅新效果。但就估唔到佢會將任務元素都加埋落去。
安戈洛環形山
互動一覽
左上：可以整郁個圖騰同樹葉
左下：將兩條骨頭禁到沉落去後會出現鞋、金猴子雕像、香蕉或姐紅寶石、發射孢子、捕蠅草會郁同跟發出怪聲
右上：蛋殼點爆後入面嘅野會望你、藤蔓伸縮、蕨類會彎、多點樹葉幾次會跌果實
右下：依照細鼓→大葉→龜殼→大葉→小葉嘅順序敲出「歡迎來到安戈洛」 嘅前奏可以令左上角嘅火山噴發
資料片牌桌 ─ 冰冠城塞
冰冠城塞係巫妖王嘅大本營，亦係玩家最後擊殺巫妖王嘅地方。而佢今次劇情係用左副本：「倒影大廳」嘅最後一個任務「逃離巫妖王」黎做開端。今次特別嘅地方，就係假設珍娜果陣走唔甩俾巫妖王殺左，再復活成女妖之後嘅劇情。而地標方面，都係冰冠城塞入面嘅景物黎。值得一提嘅就係左上方既龍骨，只有藍龍骸骨可以被復活成冰龍，其他龍好似紅龍綠龍等… 就會變成其他種類的骸骨龍。
p.s.《魔獸》中嘅劇情係玩家協助珍娜逃離巫妖王，千均一髮之際玩家所屬陣營嘅空中戰艦會黎打走巫妖王，同時小編亦都估唔到死騎呢個《魔獸》職業，會咁樣重現係爐石入面。
冰冠城塞
互動一覽
左上：冰柱跌落黎、多點幾次龍嘅頭骨或姐洞穴會吹起寒風
左下：多點幾次煤炭堆會出現紅、綠、藍三種火焰、地上會出現符文
〈紅、綠、藍三種火焰代表《魔獸世界》入面死騎嘅3種天賦，包括紅色：血魄死騎、綠色：穢邪死騎，同藍色：冰霜死騎，而符文就係死騎放技嘅能量黎〉
右上：禁住鐵鍊開門、敲冰塊會有聲
右下：多點幾次冰塊可以敲碎佢，會睇到爐石標記、酒杯、巫妖王雕像或姐被冰凍嘅魚人，長按後會變番冰塊