KOEI 出品嘅《Blue Reflection》係一隻有 RPG 元素嘅青春校園遊戲。遊戲系統有好多可以改善嘅地方，例如戰鬥、探索嘅流暢度都麻麻；另外，同其他角色建立好感度呢一部份都幾花時間；假設你打機係講求速戰速決嘅爽快臨場感，呢個遊戲未必適合你。

不過劇本要讚嘅，話哂都係《奇諾之旅》作者時雨沢惠一老師有份寫，角色性格鮮明，彼此嘅情感互動描寫得好細膩；場景、過場動畫等等都落足心機，設定好靚，加埋背景音樂，成件事真係少女味濃得黎又好 pure 好 true（喂）所以我都推介大家玩架。

主要角色連配角共 15 位

【故事大綱】

女主角白井日菜子本身係芭蕾舞選手，喺參加國際大賽時雙腳受傷，因此以後都無辦法成為職業選手；失去芭蕾舞就如同失去咗人生目標，日菜子喺一片哀愁中開始佢嘅高中生活。

開學當天，日菜子被扯進了異空間，得到力量變身成為魔法少女 Reflector；返到現實之後，日菜子發現 Reflector 唔止佢一個，仲有班上面兩個同學：夕月及來夢。因為堅信成為魔法少女，自己對腳就可以醫返好，所以女主角嘅戰鬥生活從此展開。

制服姿（日菜子→夕月→來夢）

變身後

往後嘅情節發展我就唔劇透了，我只能夠講，如果你有細心留意夕月及來夢喺遊戲中嘅登場方式，你會馬上察覺：呢個遊戲絕對唔係單純嘅魔法少女故事咁簡單，角色之間帶啲偏執嘅愛、少女之間嘅猜疑，係故事嘅賣點之一。

【遊戲系統】

遊戲中可以探索嘅地域分為「學校」及「異空間」，以 RPG 黎講算係少選擇。明明係校園生活 Play，如果好似《Persona》咁有放課後自由探索，遊戲會耐玩好多啊……同埋因為故事無支線任務（有嘅都係必須要做嘅 Task），加上有 Fast Travel，所以除咗一開 Game 我有行哂所有地域之後，往後時間都直接飛去任務地點算了 LOL

地圖：清晰標示邊度有事件或劇情發生

收集光點，可增加與朋友對話的好感度

任務介面好易睇

任務對象會散發奇怪氣場，一睇就知

【增加同伴好感度】

呢個部份，個人認為係成個遊戲入面做得最細膩嘅地方。《Blue》入面，每個角色嘅性格同成長背景都描寫得好到位；而日菜子同角色之間發生嘅事件，因為有日常對話、亦會有群組 Chat Group，認真睇哂啲對白嘅話，會令人覺得好似真係同對方做咗朋友咁架（二次元萬歲！）

通訊軟件：上堂同隔離位 Send 短訊（誤

放課後約會同學係一種好感培養 Play，不過得幾句對白睇…

角色性格鮮明，例如呢個係陽光運動系直線煩膠

不過官方將場景設定為女校嘅用心我都明嘅，因為可以大條道理狂派 Fans Service（笑）例如成班女學生喺更衣室對話、上游水堂等等嘅情節；又或者係配合遊戲入面天氣變化，無錯即係落雨（毆）所以搞到件校服濕笠笠之類（掩面）

喺同學沖緊涼時衝入去背後抱……呢個係咩玩法

上 PE 堂當然係吹水多過做運動

女校教育：就算 PK 了也要好好擋住內褲

更衣室入面其實係女學生嘅戰國

仲有日日留意你著緊咩色底褲嘅同學

遊戲入面連落雨都係美好的（喂）

睇完福利圖就係時候講下戰鬥系統了。

【戰鬥系統】

遊戲嘅小型戰鬥都於異空間進行；異空間共有四種，全部以人類嘅情緒作為設計概念：

（從上至下、左至右）喜樂、悲傷、忿怒、恐懼

異空間裡面採取即時遇敵系統，只要接近敵人即可觸發戰鬥；遊戲中並唔存在「先制」或者「偷襲」呢啲常見嘅 RPG 戰鬥設定，所以就算比敵人掂到你先都無所謂 orz

TBS 系統：角色敏捷度會影響出戰順序

至於圖左下角嘅 Reflect，可以理解為儲氣之類；不過佢嘅用法就唔係儲滿之後開無雙或者超必，相反，Reflect 就算得 1％ 你都可以用，只不過係可以用幾耐／用幾多次咁解 (・ω・)

Reflect 會喺戰鬥期間累積，可用指令為「防禦」「回復」以及每儲夠 30％ Reflect 可以出多一個戰技；打小怪還好，打王時都係搵個角色 Charge 住個 Reflect 好啲！

無 Reflect 時揀防禦都無用

使用所有戰技都會有特效睇

遊戲每一個章節都做到好似動畫咁，每一集有一個主題；而角色之間互動、甚至係三位主角變身開始戰鬥等情節，遊戲都用 3D 動畫形式去表現，特別係打大佬嗰幾段動畫，真係華麗到我目瞪口呆！

Boss 嘅設計同啲小怪真係差好遠……

就咁睇圖都覺個畫面無啦啦靚勁多

因為呢啲係打 Boss 先有嘅戰鬥動畫

出超必出到好似無雙啲 Trailer 咁靚 orz

【Boss 戰】

至於日菜子嘅超必幾時先出現？答案係每次打王嘅時候！無錯，平時喺異空間戰鬥係出唔到呢一招架，因為呢個絕招係基於「愛與友誼」的力量，要喺日菜子出現「一切由我來守護」嘅心態時先會用到 LOL

但係呢……可能因為超必打王嘅動畫表現太順、而平時活動表現太 Lag，所以個暢快度都幾大落差，啲資金係咪擺哂喺動畫製作上面搞到無錢搞其他 engine 啊？LOL

Boss 戰前可揀一齊上戰場嘅同伴；每次最多可帶四位同伴，每人各有一招攻擊技

例如網球部成員個戰技就係車個網球落敵人度…

遊戲入面可攻略角色共有 12 位，每一個都有 2～3 樣技能，例如係能力加成或者攻擊輔助等等。

技能隨住與角色好感度增加而開放，不過只要跟住劇情做哂啲支線，基本上都唔會 Miss 任何嘢 (・ω・)

技能係加喺主角嘅 Skills 入面作為能力加乘

同伴們嘅技能係可以 Upgrade 的，喺異空間入面，戰鬥或探索都會得到素材；拎住素材去異空間嘅「知覺之束柱」就可以進行技能升級及製作資源。

素材放喺廳度…唔係，係放喺地下閃閃吓

有啲升級資源要自己整出黎

【角色 升 Level】

對於無時間練 Level 嘅玩家黎講，呢個可能係成個 Game 最友善嘅設定：角色升 Level 唔係取決於你打左幾多怪，而係幫過幾多同學仔解決問題～簡單黎講，只要做哂啲任務就可以穩步升級！！

升級有分四個範疇：Attack、Defence、Support、Technique；隨住每個範疇等級提高，就會開放唔同嘅角色固有技。至於升級點數如何分配就睇你喜好了，我個人就偏好將夕月培育為輔助型角色～因為佢本身初始攻擊力唔係好高，但敏捷度高；一開始戰鬥時我會鐘意用佢幫其他人加 ATK 或者 DEF 先。

總括黎講，我玩《Blue》都係玩得幾開心的，場景、人設、背景音樂三樣嘢我基本上比滿分，做得好纖細；如果探索地圖可以增加場景例如市中心、商場；或者增加與同伴嘅互動情節，遊戲應該會更加豐富；至於戰鬥方面，系統其實做得唔錯，以非 Hard Core 戰鬥黎講佢算做得幾有心思。成個遊戲嘅缺點應該都係整體活動表現唔夠流暢吧……定係我要求太高呢？LOL

最後為大家送上遊戲的 Trailer：

【遊戲資訊】

推出日期：2017.03.30（日文版）2017.09.28（中文版）

對應平台：PS4 / PSV