今年既 TGS 我地好榮幸可以近距離參與由開發商 Quantic Dream 既 co-CEO Guillaume de Fondaumière 親自示範《Detroit》實機遊玩，今次既試玩內容係第三位角色「Marcus」部份，佢係一位擁有特殊能力既 Android，只要觸摸其他 Android 就可以令佢覺醒，成為有自由意志既一個「人」。
係今次既示範入面我地見到 Marcus 都擁有對上一次我地試玩既角色 Connor 既「Mind Palace Mode」，係呢個模式下可以見到附近可以進行互動既地方同任務提示。另外今次所展示既部份目標係爆破一間 Android 店並且令到入面既 Android 覺醒，對比起上一次既試玩動作場面係比較多的。
目標「Android 店」
開咗「Mind Palace Mode」之後就知道有咩地方可以 Hack
因為啲 Android 都係有高端運算能力既人型電腦，所以每次行動前都可以進行運算計算行動成功率，從而得出最佳既選項，不過係部份情景下亦都會因應情况而衍生出唔同既選項，因應玩家既選擇會對劇情有巨大既影響，Guillaume de Fondaumière 直情同我地講連佢都唔知有幾多結局！
以呢個行動為例，係地盤上返黎果陣比警察發現，跟住就會出現選項
同 North 扮情侶錫錫掩人耳目
放棄任務逃跑
搵地方匿埋
基本上係示範見到每個選項後面都會演變成三個選項，重覆性極低，想試晒咁多種選項會帶黎乜野後果都真係幾襟玩。
係呢個位係要捉隻警察無人機落黎，事前分析佢既行走路徑同計算唔同位置既成功率
最後發現只有路邊既棚架夠高可以捉到
當 Marcus 成功爆入去 Android 店並令入面堆 Andorid 覺醒之後，佢認為要向人類表達出「革命」既訊息，係呢個時候可以選擇溫和定係暴力既方式去表達，示範入面係選擇採用暴力既手法。有趣既係每次行動都會有溫和同暴力既選項，但當你開始選擇暴力既做法之後接落黎既選項亦都會越黎越激，到最後直頭返唔到轉頭。
令班 Andorid 覺醒之後進行演說，游說佢地加入自己陣型
向人類表達革命既訊息
仲有得揀標語添
全部用溫和手段表達訊息既場面係咁
全部用暴力手段表達訊息既場面係咁 (連啲櫈都推冧晒)
最後既底線，當你開始放火就無辦法返轉頭行溫和路線 (喂你放完火同我講你無心你估我信唔信你丫拿……)
當然你要戰便要負上相應既代價
Guillaume de Fondaumière 透露已公開既三位角色 Kara，Connor 同 Marcus 將會係遊戲內可使用既三位主角，當然仲會有其他角色穿插係遊戲當中，相信幫助 Marcus 既 North 都係其中一員，而呢種角色總數會有十五位，呢十五位角色到有各自既立場、性格，甚至會同其他角色產生糾紛，最重要既每一位角色到會有機會死亡並影響遊戲既發展！
當然遊戲仲有好多未知性，所以我地提問會唔會有其他元素係遊戲入面，例如射擊戰甚至係駕駛咁，不過 Guillaume de Fondaumière 就話佢地並唔係希望製造第二隻 GTA，而係希望玩家著重係遊戲劇情既體驗。
就現階段所見到既片段黎講《Detroit: Become Human》呢隻遊戲係非常之出色，劇本極度龐大而且分支極多重覆性低，真係同一隻 Game 夠你玩 N 次，鍾意體驗人生交叉點既真係要 J啦！
可以重溫下上次 E3 既 Trailer：
回帶相關文章：
極期待冒險大作《Detroit: Become Human》實機試玩流程介紹報告