雖然講咗好多次，但都要再講多次：我真係好鍾意 Falcom 公司嘅 RPG 作品啊啊啊啊！而喺《YS》同埋《軌跡》兩個系列入面，我個人係偏好《軌跡》派的，到而家都仲係難忘《空軌》帶比我嘅感動！
至於《閃軌》，我原本以為《閃2》會就咁作為完結，直至公佈會出《閃3》時我心情都幾複雜，因為故事入面人死不能復生，而帝國同埋地方之間革命派嘅爭鬥，我以為 Falcom 會開條新嘅故事線黎寫……故事方面係點樣發展、點樣埋尾，真係要玩咗先知，雖然我一早訂咗 Premium Box，不過既然 TGS 有得試玩，我當然係衝去先睹為快啊～
《閃3》設於 KONAMI 的試玩櫃位長期排滿人
故事方面，因為遊戲一開始會有好詳細嘅引子，所以無玩過《閃1》《閃2》嘅朋友都可以無縫接合地跟到個故事；不過當然我會強烈建議你玩哂三集啦（笑）至於《閃3》劇本發生已經係《閃2》內戰一年半嘅事，男主角リィン亦已經畢業，成為新設軍校「トールズ士官学院・第Ⅱ分校」嘅導師（雖然都係講緊20歲出頭）。
內戰後嘅成片大陸處於混亂入面，今集故事就係講貴族派、地方政權、以及秘密黑暗組織《結社》三方面嘅鬥爭。
男主角以及《閃3》出現嘅新主角們
試玩部份約 20 分鐘，當然就唔會知道故事發生咩事架啦；不過要試哂成個 Battle System 就時間足夠有餘。《閃3》同前兩代一樣，戰鬥用 TBS 系統（所以角色敏捷度會影響攻擊先行率），攻擊方面，分為「普攻」「戰術」以及「Arcs 法術」三部分。非指定戰爭可以嘗試逃跑，每一回合只可進行一個指令，例如食藥或防禦等；成個系統好易上手，有玩過系列作嘅朋友應該相當熟悉。
每場戰鬥上場人數上限為四人；中途可以換人上場
部份角色可以轉換攻擊模式，例如 Attacker 變成 Gunner；唔同敵人有唔同屬性，除咗常見嘅火水木屬性之外，唔同武器對唔同敵人構成嘅傷害都會有所變化。
Arcs 法術係《軌跡》系列經典系統，每位成員有一個主屬性，然後可以安裝唔同嘅法術或者輔助技能。
LINK 系統亦係《閃》經典設定，玩家可以自己選定邊兩位角色做連結，連結效果由自動追擊或者自動回復都有，角色間牽絆越高，效能越大
LINK 系統可以兩位角色出合力技
唔同角色配搭出黎嘅效果都會唔同
不過試玩淨係可以玩到以上部份，有少少可惜，可能想吸新手入坑？因為上面介紹嘅部份同前兩集其實分別不大，而操縱機械人嘅「騎神戰」等等嘅元素都無得試。
話雖如此，如果你未玩過《閃軌》，我真心推介你花時間煲呢個系列，值得架！同埋《閃3》登場角色唔止有《閃1、2》嘅成員，部份《空軌》成員例如係工房嘅 Tilda 都會由蘿莉變成少女出場，而《結社》登場角色應該係咁多個系列入面最齊最多嘅添！
《閃之軌跡 3》2017.09.28 就會上市，PS4 平台限定！
最後為大家送上本人手殘試玩 play：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。