【TGS 2017 試玩包膠】Bandai 強大新作《CODE VEIN》＝新手向《Dark Souls》

自從《CODE VEIN》公佈以黎，我一直對遊戲充滿期待，所以今次 TGS 會場入面有得試玩，我就當然唔會錯過呢個機會啦！如果本身未聽過呢個遊戲嘅朋友，可以參考以下呢篇文章【 CODE VEIN 噬血代碼繁體中文化情報】。

《CODE VEIN》宣傳圖

《CODE VEIN》故事大概係講，主角一行人係吸角鬼，喺壞滅嘅都市「VEIN」入面奮力生存，一方面想搵出世界嘅出口，一方面亦想搵出自己存在嘅意義。就咁講好似有少少抽像，不過詳細故事內容始終希望玩家自己去感受啦……因為我真係覺得個世界觀好正！！

咁世界觀正係一回事，試玩完覺得連個遊戲都好好玩先係重點！遊戲試玩淨係得 20 分鐘，主要係比大家試下個 Battle System。《CV》嘅戰鬥系統唔難理解，排隊時工作人員會比份操作說明書你睇，基本上離不開輕攻、重攻、特殊技（R2 + 四粒 Command 制）以及「吸血」系統。

嗯，事先聲明，我近年先接觸比較 Hardcord 嘅遊戲，所以我淨係玩過 Bloodborne，而 Dark Soul 係睇輔仁其他手足玩的，我打機絕對無佢地咁叻 orz

試玩部份入面，玩家要喺地洞入面搵路返上地面，同行仲有上圖嘅女主角之一嘅 Mia 作為支援系 NPC，會攻擊、亦會喺你低血量時幫你補 HP。不過阿 Mia 呢一刻打人唔係好痛，出輔助支援之前又唔會單聲比你知，所以每次以為自己就死，條 HP 突然補返 200 血嗰吓真係感受到人間有情吖！！LOL

成個界面同戰鬥設定其實相當有 Dark Soul / Bloodborne 嘅感覺，卒怪三兩刀可以 KO 你，扣血相當痛，不過試玩版入面嘅怪唔算變態，最多都係連打你一兩下，如果想玩得保險啲，嘗試拉開距離逐隻逐隻打就應該會輕鬆不少，玩開 Hardcore 遊戲嘅朋友應該會一秒上手添（笑）

不過試玩時間有限，與其清哂啲怪，我比較想盡量試多啲唔同嘅戰技，特別係遊戲著重嘅「吸血」系統。「吸血」唔係吸敵人血補自己 HP 呢啲 RPG 法術，而係一種類似蓄力攻擊嘅重型特殊攻擊。

從後偷襲進行「吸血」

或者將敵人打飛到半空，看準時機進行「吸血」

發動「吸血」都需要時間，喺試玩入面，主角得 1～2 Lv，唔知隨住角色升級，「吸血」指示會唔會變得快少少呢？雖然遊戲仲有正方形「輕攻」以及三角形「重攻」，但係「吸血」單一下造成的 Damage 值比以上兩種攻擊要多；到底要點樣運用三種戰鬥基本攻擊，或者真係要等遊戲正式出版細心遊玩先知了。

主角可以換武器（不過試玩時無得試呢個功能），以及按 R2＋Command 制使用特殊技；特殊技有次數限制，部份技能則會隨時間慢慢回復；目前仲未清楚點樣得到新技能，因為角色升級係全能力加乘，而唔係好似時下流行嘅 RPG 系統咁樣比玩家揀技能點、或者自選強化某部份能力，所以呢一部份有待觀察～

不過戰鬥以及角色動作流暢度唔錯，喺窄路入面唔會出現 NPC Mia＋怪物塞住條路搞到你郁唔到嘅邪惡狀況（笑），至於指令方面，上一個指令完咗先會接收到下一個指令，而唔同指令嘅執行時間都會有所唔同；所以，假設你攻擊中途被扣血，而你想補血，最好都係彈開十丈遠先啪藥水……嗯其實同《Dark Souls / Bloodborne》真係好鬼似呢～～～LOL

場景同埋音效方面，以試玩版黎講做得非常細緻；雖然上面我係咁話《CV》似《Dark Souls / Bloodborne》，不過喺難度、風格上面，《CV》其實相對地無咁陰沉，用色、角色設定方面都仲有好有日系 RPG 嘅風格喺裡面；所以我覺得玩開 Hardcore 遊戲嘅朋友固然會好快對《CV》駕輕就熟，但如果未玩過 Hardcore 遊戲嘅玩家，絕對可以考慮以《CV》做一個新嘗試，慢慢開展多一個遊戲類型領域。

遺憾地係，試玩開頭花咗太多時間試「吸血」系統，結果，明明試玩版可以直接喺營地飛去打王，我都唔夠時間打死佢……醒起要打王時已經得返幾分鐘（掩面）試玩版嘅王如果係正式版遊戲嘅頭王嘅話，其實唔算難打，佢係出招快，但係攻擊同攻擊之間有空隙的；加上你有偉大的 NPC Mia 喺度，如果隻王比 NPC 分散注意力時立刻進行「吸血」攻擊，其實 5～6 次左右（假設隻王唔會 call 馬或者改變攻擊模式及形態）應該打得死頭王。

……好想快啲玩到正式版！