係今次既 TGS 2017  我地有幸試玩到由 Biohazard 之父三上真司監制，將會係 10月發售既驚慄大作《The Evil Within 2》，而且試玩既版本相信已經係正式版黎，立即同大家講下試玩後感！

今次試玩大約有20分鐘左右，不過我地咁 Pro 已經極速衝到第三章 (望隔離部機仲玩緊第一章咋)，過程中遊戲氣氛營造得極好，配合出色既交響樂、超越業界新標準「30fps流暢表現」、再加上超高畫質表現 (疑似有 PS4 Pro / Xbox One X scale up，可能正式推出會支援 4k)，絕對比前作更加吸引。

今次玩家依然係扮演上集既主角 Sebastian Castellanos，比 Mobius 組織強制要佢進入勁多恐怖生物既惡夢度搵返自己個女同埋幫助 Mobius 拯救隊完成任務。而係惡夢入面除咗 Mobius 拯救隊之外仲會發生大量古怪事件 (第二章逃命情節極有電影感！)，不過係呢度就唔劇透啦。

今代既戰鬥比起上集增加咗更多動作同能力，槍同彈藥依然係一貫地少，刀仔將會係閣下主力既武器，當然潛行擊殺、陷阱等等都係你既好幫手啦。順帶一提本作既視點係好有《Biohazard 4 / 5 /6》味道。當遊戲進度去到第三章就正式可以改裝、製作武器，打起上黎都會順手少少。

上集幫你升級既護士姐姐同黑貓一樣會出現幫你手，暫時仲未知會有咩登場角色 (鬼咩都未玩到)，不過捱多 2個星期就可以玩到啦，極度推薦入手之作！

《The Evil Within 2》將會係 10月13日發售，對應平台為PS4、Xbox One、PC。而 PS4版本即日起到 10月11日前預定實體版將可獲贈紀念 T恤1件，數量有限，送完即止。另外首批遊戲碟仲會送埋幫你保命既「最後機會包」，快手把握機會訂咗先啦！