講起而家嘅日系 JRPG，大家可能都會諗起《FFXV》呢類型集合動作、歷險於一身嘅大製作；不過，其實業界仲有好多堅持製作舊式回合制 RPG 嘅公司架！對於日本 RPG 愛好者黎講，2D 平面回合制角色扮演遊戲，係好多而家新系列嘅「原點」同埋「初心」，所以喺而家咩都追求畫面嘅潮流入面，呢種叫做舊式嘅遊戲都仲係有好多支持者。

上次介紹過 Square Enix 子公司 Tokyo RPG Factory 十月嘅新作 RPG《LOST SPHEAR》，今次介紹嘅就係 SE 自家開發嘅新 Game《project OCTOPATH TRAVELER》。

《pOT》正如題目所講，係一個 2D 嘅 RPG 遊戲。玩家喺八個角色入面揀選一個，然後喺遊戲嘅世界觀入面開展該角色嘅故事。八個角色嘅身份同埋職業都唔同，故事路線發展當然亦都唔一樣；但係八人喺遊戲入面互有關聯，要了解哂故事嘅全貌，即係話要玩哂八條故事線先得啦！

唔同角色嘅故鄉同埋活動地域都唔同，以下圖片因為係我自己睇片截圖的，像素可能會差少少；不過「製作 2D 遊戲」以及「提供 HD 化嘅畫質」係工作室想帶比玩家嘅體驗，加上……SE 出品其實喺畫面同埋音效呢兩方面，我又真係從來無擔心過（笑）

各個角色職業唔同，各自擁有嘅「技能」都有分別；「技能」唔只係指 Battle 專用戰技，而係指喺一般地域都可以對其他 NPC 角色使用嘅指令。

例如戰士角色指令係「試合」，好聽嘅叫「武藝切磋」

戰士可以同 NPC 提出「試合」要求

咁 NPC 都有強弱之分，亦唔係每個人都會願意同你「試合」；「試合」成功機會率同角色嘅等級係掛勾的

又或者舞孃角色，技能係「誘惑」

成功誘惑嘅 NPC 可以作為戰力使用（呢個設定好黑…NPC 死咗都唔駛負責任 Yeah）

戰鬥方面，目前官方資料唔多，不過睇 Trailer 都估到大概；戰鬥行 TBS 系統（邊個條 Bar Load 完就邊個行動先），戰技有分普攻、以及消耗 SP 的特技

似乎會有弱點傷害機制，就咁睇戰鬥方面應該好易上手

城鎮入面會有支線或者劇情發生

雖然話係 2D 遊戲，但其實場景做得好細緻，階段差同埋陰影細部都做得好好

想知自己啱唔啱玩？《pOT》而家喺任記 eShop 開放緊免費試玩版下載，有興趣嘅朋友睇完呢篇介紹，如果同我一樣晚晚玩《Destiny 2》玩到攰攰地，又未夠 Light 打 Raid（喂）嘅不如直接 DL 黎轉換吓心情吖！

遊戲 Trailer：

【對應平台】Nintendo Switch / 3DS

【發售日期】2018 年（日子有待公佈）