有玩開 3DS 嘅朋友應該就對呢個遊戲系列唔陌生，因為「角落生物（すみっコぐらし）」嘅遊戲都出得幾密吓。「角落生物」係 Sanrio 旗下嘅卡通角色之一，圓碌碌笨嘟嘟嘅造型，喺日本各個年齡層都幾受歡迎架。

黎緊佢又出新嘅小遊戲合集《すみっコぐらし すみっコパークへようこそ（歡迎來到角落生物樂園）》，今次仲係系列作第一次登錄 Switch 平台添！
雖然望落去傻更更嘅造型或者未必好迎合男性玩家嘅口味，不過遊戲推出日子為 2017.12.07，臨近聖誕噃！無論係有男有女嘅聖誕聚會、或者同屋企入面嘅小朋友一齊玩，呢個簡單輕鬆嘅遊戲或者係唔錯嘅選擇。或者買 Game 搭埋部 Switch 送比女朋友，應該都會幾開心啫！

遊戲共有四個可玩地圖

大家以前細個有無玩過「生命之旅」呢類型嘅棋類遊戲？《角》嘅玩法有少少類似，玩家（1P～4P）輪流掟骰仔，每一格有唔同嘅遊戲或者指令；睇吓邊個最快行完個 Map 再計埋分就可以分出勝負。

圓碌碌

就咁睇圖唔係好知呢個小遊戲玩咩…鬥轉得快？LOL

圓碌碌碰碰車

玩到攰仲可以去角落生物嘅休息室度同佢地玩

呢個章魚燒遊戲我想玩呀，玩法有少少似 PS2 個《吉野家》

遊戲中得到嘅金幣仲可以幫角色換裝添

話明係 A 級遊戲，當然就係老少咸宜嘅輕鬆 Play 啦（笑）

遊戲製品版與 DL 版同價為 5,800円（税抜），2017.12.07上市，有興趣嘅朋友就到時留意下啦！

最後比舊作既片段大家參考下：