最近日本有非常多由漫畫改編而成的電影，而剛剛上映的《東京喰種》其漫畫則是筆者嘅最愛之一。當得知漫畫選角後實在令筆者又擔心，怕失去原著味道，但昨晚看後確又令我喜出望外。

首先故事方面，電影帶出兩個主題，何為正邪定分界和生命有無分對與錯。而電影一開頭只是短短快速交代故事主角金木如何成為喰種，之後大部分時間都用來描述金木由人類變為喰種嘅心路歷程和故事嘅世界觀，劇情流暢並進度快，無過份嘅拖泥帶水，使觀眾更易投入和明白金木嘅痛苦和矛盾。值得一提嘅係故事有90%忠於原著，如果讀者係喰種迷，都會知道故事中有多個名場面令讀者印象深刻，而導演亦在電影中一一呈現，使筆者呢啲喰種死忠更加睇得興奮。雖然打鬥場面唔多亦唔算激烈，但作為結尾嘅大戰亦令主角金木和宿敵剛太郎有心理層面上嘅進展，可以話係為續集留一個伏線。

而角色方面，男主角金木研由窪田正孝飾演，講真，當時筆者知道呢個消息實在係一地眼淚，可能窪田正孝之前飾演嘅夜神月實在太深入民心，無論佢演咩角色我都總覺得有夜神月嘅影子，而且論樣貌身材年紀佢都同金木研有一段距離，所以筆者入場前深怕窪田正孝會毀左套戲。但幸好窪田正孝用佢嘅演技完美地呈現到金木研嘅神粹，無論金木內心嘅矛盾，轉變帶黎嘅痛苦，個人原則引至嘅飢餓感甚至暴走時嘅瘋狂，窪田正孝都演得洽到好處，令觀眾完全感受到角色當時嘅情緒。而女角方面清水富美加飾演霧島董香和蒼井優飾演神代利世都做得非常好。不得不提大泉洋飾演嘅真戶吳緒，無論做型樣貌角色神韻都跟足原著。而唯一不足嘅就係如果鈴木伸之飾演亞門剛太郎可以再大隻啲甘就完美啦！

而不得不提戲中最重要嘅完素 – 赫子。戲中並無詳細解釋赫子嘅由來，分類，循環相剋等等（同行友人睇完戲後仲以為係依性別分類得到唔同嘅赫子⋯⋯）可見未睇過漫畫嘅觀眾會對呢個設定充滿疑問。而睇慣日本電影嘅觀眾相信都知道日本係CG方面確實比較弱，而電影中嘅赫子雖然像真度不能媲美外國，但亦見導演儘量在戲中表現出赫子嘅靈活性和力度。

總括而言，作為真人化改編漫畫電影，《東京喰種》絕對合格有餘，而喰種迷當然不能錯過呢部誠意之作，相信看完後一定會感受到導演和演員們將喰種世界觀完美呈現給觀眾嘅努力。而未睇過喰種漫畫嘅朋友亦應該一看，因為戲中演員嘅演技同故事中正邪嘅矛盾絕對會令大家投入於戲中，身為一套漫畫改編電影但亦能拍出令觀眾反思嘅情節，觀感與深度相輔相成，實屬難得，大家不容錯過！