雖然我相信 PS4 版玩家已經晨早打爆《FF15》主線，但係遊戲其實一直有定期更新添加新元素，除咗早前介紹過嘅《大隻佬 DLC》及《金毛仔 DLC》之外，年尾仲有《四眼廚娘 DLC》推出；除此之外，仲有 VR 釣魚（雖然試玩完之後我覺得相當麻麻）以及遊戲內免費更新嘅限時任務模式……簡單黎講，可以玩嘅嘢都仲係有好多！
如果有留意開《FF15》動向嘅朋友，或者會留意到八月頭嘅時候，其實遊戲曾經推出過好短時間嘅「網上連線模式」Beta 測試，即係玩家可以自創角色，喺《FF15》嘅異世界入面開始美好生活（喂），仲可以連線去其他玩家嘅世界入面一齊打怪！
雖然有機會參與公測嘅玩家唔多，而且公測出黎嘅反應都唔算樣樣正評（始終係測試中，同埋 Square Enix 爛 server 都唔係舊聞…）；不過，由前可見官方對《FF15》充滿野心，始乎真係想將佢轉型成為 Online Game！
SE 社剛剛就肯定咗我嘅猜測啦！尋日佢地公佈《FF15》將於 2018年 春天遊戲登錄 Windows，仲要跟哂所有更新檔以及 DLC，包括之前頭先提到嘅「Online 擴張 Pack：戰友」，務求令更多玩家接觸到呢個遊戲！
老老實實《FF15》喺遊戲劇本上並無帶比我好大觸動，遊戲後半部（進入水都之後）嘅故事進度同埋劇情安排更加可以用「一團糟」黎形容。
不過《FF15》嘅動作戰鬥部份真係做得幾好，即時遇敵進入戰鬥嘅真實臨場感，而魔物嘅種類同難度都有一定難度挑戰玩家能力同耐性；至於畫面、場景、配樂呢啲更加唔需要多講，，FF系列喺呢幾方面有邊次會令玩家失望？
打到呢條水龍嘅時候我都唔係好想理故事了
所以未玩《FF15》或者無 PS4 嘅朋友，黎緊可以考慮落坑！不過遊戲就事先講到明：PC 需求高規格！為咗令玩定喺畫質同動作流暢度上面有最佳享受（Native 4K，最高推到 8K）兼對應 HDR10，所以如果屋企隻 Mon 唔夠靚嘅話，可能睇以下畫面就無咁賞心悅目了～
【Windows 版暫定包含內容】FF15 本篇、全 DLC（包括埋 Online 戰友 Pack）、所有 Update
【推出日期】2018年 春季
有興趣嘅朋友趁呢段時間考慮吓係咪要乘機 Upgrade 吓 PC 設備啦！如果想換 Mon 但又唔知揀咩，可以睇吓之前另一篇《Gaming Mon 介紹》喔～
回帶相關文章：
《FFXV DLC 1 格拉迪歐藍斯》 大隻佬熱血修行 Play
【FF15】無劇透・普羅恩普特 DLC 雪地尋根敢死行！龍騎女治癒Play超搶戲
【FF15】DLC 第三彈・四眼廚娘 Ignis 最新 Trailer 好似係凌虐 Play…
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。