有玩開 PlayStation既應該都唔會對《Uncharted》系列陌生，對上一隻《Uncharted 4: A Thief’s End》已經講到明會係系列男主角 Nathan Drake 擔正既最後一集，好多人都以為《Uncharted》會係咁先，所以之前係 PlayStation Experience 公布呢隻外傳故事《Uncharted：The Lost Legacy》大家都好興奮，到底實際玩落去又如何呢，會唔會由二個女人擔正就無咁爽？

入正題前先講講《Uncharted：The Lost Legacy》本身係《Uncharted 4: A Thief’s End》既 DLC，但係因為整整下越整越長所以先變成一隻獨立出售既外傳遊戲。而之前買咗《Uncharted 4: A Thief’s End – Triple Pack》(即係 DL 豪華版) 既係 8月22日推出當日就可以直接下載，之前無買到既就唔洗係 PS Store 度搵啦，因為個 Pack 咁鬼抵所以晨早下架啦。

記得係呢個pack先有得DL

DL 既時候我真係嚇親，呢個「DLC」成 43GB，果啲就咁改改個 UI 就話係續集既遊戲公司應該覺得慚愧啦 (又話十年計劃又剩)，聰明既讀者一定知我講邊隻既。

我真係唔係講緊呢隻 Game 呢

今集故事背景係《Uncharted 4》完結之後，講述黎自二代既尋寶獵人 Chole Frazer 同埋有玩過四代都應該唔係幾鍾意佢既傭兵首領 Nadin Ross 呢二位女主角，為咗搵一件失落既寶藏象神之牙 (Tusk of Ganesha)既故事。當然同以往集數一樣，係會有敵對勢力同你爭既。

遊戲初期亦即係 Sony Experience入面播出片段既部份，其實係講 Chole 潛入印度一個比軍閥控制住既地方去偷取象神之牙寶藏線索，同時亦都係匯合 Nadin 既地方。而且係非常早期就有類似四代逃出監獄果 Part 既逃亡戲，緊張程度絕對 Keep 到水準。

非常精彩既逃亡戲

有敵人既場景比起四代相對地少咗好多，而且可以隱匿既草叢又出奇地多，又新加入裝咗滅聲咀既手槍，降底咗比敵人發現既風險，變相令到戰鬥難度大大下降。

而且重要既戰鬥場面普遍都比較容易，對動作遊戲苦手黎講算係德政，但係對於追求難度既玩家就可能會覺得有啲失望啦，呢點真係有少少可惜。

就算面對載具其實都係唔係咁難

今次新增咗解鎖呢個元素，除咗開門鎖開武器箱之外係特定既戰鬥場面仲需要開武器箱黎拎強力武器擊敗敵人，要同時兼顧隱匿行蹤同開鎖的確係幾刺激。

估唔到女角都拎得到呢支重機……

遊戲解謎部份見得到係花咗唔少心思，而且整體亦都唔算簡單，呢點值得一讚！(我個人黎講隻 Game 70% 係解謎都得架)

今次謎題數量夠多而且質素有返咁上下，抵讚！

前期有一堆小型神殿，每個神殿入面都會收藏咗一個古代 Coins，只要收集晒就可以得到條搵寶藏神器。(附近有寶藏就會有聲效同發紅光)

地圖睇落去好似非常大，但係都幾限制可以活動既範圍

另外今次既大賣點係遊戲首次支援4K超高清顯示，的而且確畫面係非常之靚，但係亦都相當之耗機能，點解我知？鬼咩……一開 Game 部 PS4 Pro 既散熱風扇開到最大……啲風聲大到我帶住 Headset 都聽到 (其實同 Party 既人都聽到)，同樣係用 Pro 既朋友記得擺部機係通風少少既地方玩，唔係我驚你燒機……(全部圖皆為 PS4 Pro畫面)

總結：

以「DLC」黎計真係超級收貨，長度有四代整體六成左右，劇本內容、節奏亦都拿捏得恰到好處 (玩完我無咁憎 Nadin) ，戰鬥場面雖然少咗但係質素都叫做 Keep到，算係咁。

係要挑剔既就係太多單向無得回頭既路，令到收集全寶藏有困難 (建議有返咁上下實力既玩家一開始就揀最難難度)。

經典Un Partner 動作得到保留！

爆機後依然可以用點數Unlock衫/無限彈等等

都係果句，以一個「DLC」外傳故事黎講真係唔錯，《Uncharted》就算無 Nathan 原來都可以好好玩架！