首先要道個歉先，之前寫文提過「DJMax 秋天上市」，但原來今次中英文合版係早過日文版出架，大家呢排行過 Game 店可能仲會見到店面有得試玩添！唔知你入手咗遊戲未呢？我早前拎到 Game 仲即刻貪新厭舊咁丟低隻 DQ11 試玩咗一輪（笑）

作為 DJMAX 之前三代 Protable 作品嘅 Fans，一開 Game 梗係即刻入 Arcade Mode 睇下今集有啲咩歌；幸運地，舊作中大部份歌曲都有再收錄喺《DJMAX RESPECT》裡面，同時，官方亦有為今次嘅新作品做咗唔少新歌，目測起碼超過十首（有啲歌要達成遊戲條件 unlock 先有的）

經典歌曲之一：DIVINE SERVICE

所有歌曲同以往一樣，全部有兩至三個難度可選，大部份舊歌喺編曲同曲譜上面都無太大變化，所以舊玩家應該超級無敵地有親切感。

不過，唔好忘記，大家而家拎住嘅唔係 PSP，亦唔係音 Game 用鍵盤，我相信大部份玩家同我一樣呢一刻手上拎住嘅係 PS4 手制（喂我唔信你用 Joystick 玩，唔好大我），所以呢……

以上圖嘅「DIVINE SERVICE」為例，喺我咁耐無玩 DJMAX ＋無為意 PS4 手制玩音 Game 原來有難度嘅情況下，一入 Game 咩都未上手，就揀咗 6 鍵 玩歌曲嘅最高難度……

結果梗係死得好慘，核突到圖都唔想 Cap，比我留返啲尊嚴比自己 orz

Equipment 方面，初始遊戲已經包埋啲基本輔助例如 Auto Fever x5（儲夠氣就自動 Fever，Fever 期間得分會增加）以及加強遊戲難度用嘅 Shading（曲譜會閃吓閃吓咁），但我相信玩耐咗之後解鎖嘅 Equipment 會增加；至於外觀美化之類就同以前一樣，都係要玩夠唔知幾多分先有得 Unlock 咁。

為咗熟習用 PS4 手制玩，我乖乖地揀返最簡單嘅 4 鍵 以及 Nomral 難度

如果玩 4 鍵都玩唔到 Full Combo 我都係返出去做嘢算 T_T

大概慣咗個操作之後，轉返玩 6 鍵

嗯嗯感覺似乎回來了 w

遊戲判定比以前簡單，基本上好難 Miss，只係睇吓你粒音係 Max 100%（Perfect）定係 Max 40%（音你就撳到啦但拍子唔啱囉）嘅分別，但如果純粹追求 Full Combo 嘅話，4－6 鍵基本上係可以無痛達標的（6 鍵部份歌曲嘅最難版本或者會有少少痛）。

換句話講，如果玩歌 Miss 咗嘅，老老實實，唔好賴判定差，因為一定係自己撳唔切先會 Miss（掩面）

遊戲優點：中途 Pause 重新入 Game 時會倒數 3 秒，亦會由旋律起首部份重新引導你入 Game

遊戲喺美術方面都有用心思，入 Game Loading 畫面出現嘅係一部 PSP……的確 DJMAX 最輝煌嘅年代都係發生喺 PSP 上面，至於 PSV？在場有幾多個人覺得 PSV 隻 DJMAX 係好玩嘅麻煩舉手。

你睇下，都無人舉～LOL

官方分享咗二人同時遊玩 DJMAX RESPECT 嘅片段，大家可以實際睇下個遊玩模式：

同以往一樣，除咗 Arcade Mode（連續玩三首歌嘅街機玩法）仲可以 Free Style 隨心玩；不過 Free Style 並唔係一開始就咩歌都有的，解鎖條件主要為：（1）要喺 Arcade 玩過 （2）玩家到某個 Rank （3） 完成 Misson Mode 關卡。

RESPECT 版新歌 PV 畫質當然就靚過 Portable 1/2 嘅古早味畫面多多聲啦

Free Style 可以按 L1 / R1 切換唔同 DJMAX 年代嘅作品

至於上面提過嘅 Misson Mode 咩形式都有，可能係指定你玩某幾首歌及分數要達標、再難啲就可能指定你要 Equipment 裝 Mirror 玩 8 鍵嘅歌……無，我講吓，我目前仲未玩到咁癲，同埋應該一世都玩唔到咁癲 LOL

玩完 Mission 解鎖到新歌曲！呢首雖然係韓文歌（我好少聽韓文）不過都幾好聽呀～

每次一個段落完咗就會聽到 DJMAX 用咗好多代嘅 Thank You For Playing 音樂，一聽到真係咩回憶都返哂黎，當年打 PSP 版，我幾乎係一上地鐵就插耳機開始玩（笑）

而家 PS4 版無論係畫面同音質當然都有好大進步，不過，如果有埋  DJMAX 專用遊玩鍵盤就好啦！而家用手制玩 6 鍵應該已經係我極限，8 鍵嘅話，我隻手指真係郁唔切 (´・＿・`)

咁我認我玩得唔算叻嘅 orz

總括黎講呢《DJMAX RESPECT》我作為系列 Fans 都相當收貨，特別係而家音 Game 其實無以前咁多，至於初音 / 太鼓雖然都係音 Game，但係玩法同賣點完全唔同；所以我都幾建議大家買隻 DJMAX 看門口，又唔駛衝劇情，鐘意幾時玩兩關都得……同埋，可以 2P 嗰吓正吖嘛！

繁體中文版（可切換英語版面）已經上市架啦！有興趣嘅朋友今日放咗工去留意吓吖！